Çempionlar Liqası
2-ci təsnifat mərhələsi, cavab oyunu
Qarabağ – Linkoln Red İmps (Cəbəllüttariq) 5:0 (3:0)

97. Fabian Buntiç
27. Toral Bayramov
81. Kevin Medina
13. Bəhlul Mustafazadə
(55. Bədavi Hüseynov, 71)
29. Marko Veşoviç
(2. Mateus Silva, 71)
8. Marko Yankoviç
6. Julio Romao
7. Yassin Benzya
10. Abdulla Zubir (k)
(17. Hamidu Keyta, 80)
15. Leandro Andrade
(90. Nəriman Axundzadə, 80)
18. Olaviyo Juninyo
(19. Redon Cica, 80)
Ehtiyat oyunçular
1. Şahruddin Məhəmmədəliyev
12. Sadiq Məmmədzadə
30. Abbas Hüseynov
20. Riçard Almeyda
24. Aleksey İsayev
66. Patrik Andrade
Baş məşqçi: Qurban Qurbanov

1. Nauzet Santana
5. İbrahim Ayeş
6. Bernardo Lopes (k)
15. Rafael Munyos
24. Cek Sarcent
(7. Li Kaskaro, 76)
21. Nano
8. Mustafa Yahaya
(23. Co, 58)
22. Qrem Torrilya
11. Culian Valerino
(18. Toni, 63)
17. Pedro Martin
(9. Kike Qomes, 46)
20. İtan Britto
(30. Karlos Cid, 58)
Ehtiyat oyunçular
13. İvan Vilyanueva
27. Ceylan Hankins
10. Andre Tice de Bar
19. Kayl Klinton
33. Cimaney Burnet
70. Viktor Villakanas
Baş məşqçi: Xavyer Munyos

Qollar: O.Juninyo, 17 (1:0). O.Juninyo, 31 (2:0). O.Juninyo, 44 (3:0). Y.Benzya, 66 (4:0). L.Andrade, 72 (5:0).

Vərəqə: L.Kaskaro, 77 – sarı.

Hakimlər: YAKOB SUDBERQ, Dəniz Yurdakul, Viktor Skitte, Yakob Karlsen (hamısı Danimarka).
VAR hakimi: Yonas Hansen (Danimarka).
Hakim-inspektor: Marian Ruzbarski (Slovakiya).
UEFA nümayəndəsi: Ena Raspopoviç (Monteneqro).

30 iyul. Bakı. Tofiq Bəhramov adına Respublika stadionu. 23700 tamaşaçı.
Birinci hissəyə 2, ikinci hissəyə 4 dəqiqə əlavə olunub.
İlk oyun – 2:0.

18 (7) qapıya (“çərçivə”yə) zərbə 3 (1)
17 künc zərbəsi 1
3 ofsayd 0
9 qayda pozuntusu 8
0 (0) sarı (qırmızı) vərəqə 1 (0)
77 topa sahibolma (faizlə) 23

“Qarabağ” tarixində ardıcıl 11-ci dəfə avrokubokların qrup mərhələsinə vəsiqə qazanmaq vəzifəsinin öhdəsindən gəlməliydi. Sözsüz, rəqibin aşkar zəifliyi, “doğma divarlar” amili və ilk oyunda qazanılan nəticə bunun üçün münbit şərait yaratmışdı. Odu ki, “köhlən atlar” ilk dəqiqələrdən rəqibi müdafiə olunmağa məcbur etdi. Təhlükəli vəziyyətlərin yolunu çox gözləmədik. Start fiti yenicə çalınmışdı ki, Zubirin cərimə meydançasında bəxtini sınamasına rəqibin müdaxiləsi mane oldu. Ardından küncdən zərbə qazanan komandanın şansını Toralın qeyri-dəqiq zərbəsi puç etdisə, Leandronun başla qapını nişan alması da işə yaramadı. Bir qədər sonra qonaqların təhlükə yaratmaq istəyi "Qarabağ"ın hesabı açmasıyla nəticələndi. Bəhlul qapının həndəvərində topu ələ keçirib irəli göndərdi. Romao - Benzya - Yankoviç “üçlüy”ü yaxşı anlaşdı, sonuncu topu Juninyoya ötürdü və belə fürsətlərin ustası olan braziliyalı hesabı açdı.

Ağdamlıların ilk qoldan sonra təzyiqi bir qədər azaltdığını deyə bilərik. Əlbəttə, bu, rəqibin qol-qanad açması üçün bəs etmirdi. Çünki xətlərarası əlaqə qaydasında deyildi, "Qarabağ"ın müfafiəçiləri də keçilməz idi. 31-ci dəqiqədə meydan sahibləri daha bir gözəl qol vurdu. Zubirin daban ötürməsindən sonra topa yiyələnən Toral Juninyonun fərqi artırmasına şərait yaratdı. Ardından Benzyanın qapıdan aralı keçən iki zərbəsini izlədik. Bəhlulun qolu isə ofsayd üzündən sayılmadı. Hər halda, nə şanssızlıq, nə də qayda pozuntuları “Qarabağ”ın növbəti qoluna mane oldu. 44-cü dəqiqədə Juninyo fərqləndi. Braziliyalı Zubirin ötürməsiylə mövsümün ilk ev oyununun birinci hissəsində het-trik etdi! “Köhlən atlar”ın 4 dəqiqə sonra vurduğu qol da sayılmadı. Toralın “çərçivə”ni nişan alması Santananın seyviylə müşayiət olunsa da, qayıdan topu Leandro tora qovuşdurdu. Belədə hakimlər Toralın ofsaydda olmasına əsaslandı.

Ağdamlıların aşkar hegemonluğu fonunda “Linkoln”un ümidi tükənmişdi. Qonaqlar aramsız hücumlara davam gətirmirdi. Odu ki, “Qarabağ”ın növbəti qolunu izlədik. Nəhayət, Benzya da sevindi. O, 66-cı dəqiqədə Juninyonun daban ötürməsini qolla tamamladı. Qeyd edək ki, bu ərəfədə Ayeş, Lopes, Munyos və Sarcent kimi oyunçuların gücü tükənmişdi. Onlar nəinki müdafiədə ciddi boşluqlara yol verir, təkbətək mübarizələrdə də uduzurdu. 72-ci dəqiqədə isə Leandro Juninyonun ötürməsini qolla tamamladı.

Beləliklə, matçın sonuna qədər hesab dəyişmədi və “Qarabağ” ardıcıl 11-ci dəfə avrokuboklarda qrupa düşdü. Amma unutmayaq: hədəf Çempionlar Liqasının qrupudu!

Gözdən qaçmadı
* “Qarabağ”ın fan-şopunda durum o qədər ürəkaçan deyildi. Xeyli azarkeş formanın baha və keyfiyyətsiz olmasından şikayətlənirdi. Həmçinin satışın əvvəlki qədər kütləvi olmadığını da qeyd edək.
* AFFA-nın prezidenti Rövşən Nəcəf, yığmanın baş məşqçisi Fernando Santuş, “Sabah”ın sabiq oyunçusu Aleksey Kaşuk oyunu stadiondan izləyənlər arasındaydı.

KƏNAN BAHADIR