Bəli, bu həftə Konfrans Liqasının 2-ci təsnifat mərhələsinin ilk oyunları keçirilir. Bu o deməkdi ki, hər üç klubumuz növbəti mərhələyə adlamaq uğrunda işin azı yarısını görmək üçün meydana çıxacaq.

Bəs matçların təxminən eyni vaxtda başlaması canlı yayında problem yaradacaqmı? Çox güman ki, yox. Çünki İctimai TV “Sabah”ın, “CBC Sport” “Zirə”nin, İdman TV isə “Sumqayıt”ın oyununu ekrana gətirəcək.

Konfrans Liqası
2-ci təsnifat mərhələsi, ilk oyunlar
25 iyul
Makkabi (Hayfa, İsrail) – Sabah 0:3
Pavol Safranko, 62. Cesse Sekidika, 78. Xəyal Əliyev, 88.
Hakimlər: NATAN VERBUMEN, Matias Hillart, Ruben Vins, Uesli de Kremer (hamısı Belçika).
Kişvarda (Macarıstan). “Varkert” stadionu. Saat 21.15.

“Sabah” Misli premyer-liqasında son tura qədər tər tökərək avrokuboklara vəsiqəni təmin edib. Düzdü, “bayquşlar”ın bəxtinə potensialın rəqiblərin ən güclüsü düşüb. Lakin bu hələ son deyil. Hər iki komanda təlim-məşq toplanışını sona çatdırıb. Hətta “Makkabi” yeni mövsümdə ilk rəsmi oyununu keçirərək ölkə kubokunun pley-off mərhələsində “Hapoel”i (Beer Şeva) darmadağın edib – 3:0. Lakin “bayquşlar” üçün ümidli olmağa dəyər. Çünki rəqib meydana İsraildə yox, Macarıstanda çıxacaq. Bu, komandanın böyük azarkeş kütləsinin dəstəyindən məhrum olması deməkdi. Üstəlik matçın keçiriləcəyi stadion cəmi 2700 yerlikdi. “Sabah” neytral meydan amilini öz xeyrinə çevirib istədiyini əldə edə bilər. Baxmayaraq ki, “Makkabi”nin baş məşqçisi Barak Bahar Masazır təmsilçisini sıradan çıxaracaqlarına şübhə etmir.
“Sabah”ın çalışdırıcısı Krunoslav Renduliçin start heyəti təxminən belə olacaq: Yusif İmanov, Sofian Çakla, Con İrasabal, Boyan Letiç, Elvin Camalov, Amin Seydiyev, İvan Lepinitsa, Coy-Lens Mikels, Kahim Parris, Cesse Sekidika, Pavol Şafranko.

Zədəli Vinsent Till oyunu buraxacaq, Anatoli Nuriyevin də eyni səbəbdən oynaması sual altındadı.

Zirə – DAK 1904 (Slovakiya) 4:0
Rafael Utziq, 29. Martins Junior, 31. Davit Volkov, 51; 53.
Hakimlər: İVO TORRES, Rafael Morim, Dani Dias, Jasim Sabotiç (hamısı Lüksemburq).
Bakı. “Liv Bona Dea Arena”. Saat 20.30.

“Zirə” Avropa Liqasının 1-ci təsnifat mərhələsində “Şerif”ə uduzmaqla azarkeşlərini üzdü. İndi heç olmasa, Konfrans Liqasında yola davam etmək lazımdı. Rəqib Slovakiya çempionatının son mövsümündə 4-cü yeri tutan “DAK 1904”dü. Bu komanda beynəlxalq arenada uğur qazanmayıb. 2018/19 mövsümündən bəri müntəzəm avrokuboklarda çıxış edən komanda ötən mövsüm 1-ci təsnifat mərhələsində dayanıbsa, ondan əvvəl üçüncüdə “əyləci sıxıb”. Ümumiyyətlə, komanda geniş azarkeş kütləsinə də malik deyil. Qısası, “Zirə” ev oyununda qənaətbəxş nəticə qazansa, cütün qalibi olmaq şansını xeyli artıracaq.

“Zirə”nin baş məşqçisi Rəşad Sadıqovun ilk “11-lik”də güvənəcəyi futbolçular bunlardı: Tyaqo Silva, Ange Mutsinzi, Ruan Reanto, Eldar Quliyev, Pyer Zebli, Ceyhun Nuriyev, Hacıağa Hacılı, Rafael Utziq, Qismət Alıyev (k), İssa Cibrilla, Davit Volkov.

Sumqayıt – Fehervar (Macarıstan) 1:2
Səbuhi Abdullazadə, 20 - Tobiyas Kristyensen, 39. Ksaba Spandler, 52.
Qırmızı vərəqə: Murad Xaçayev, 32.
Hakimlər: FLORİAN LATA, Xulio Mani, Reydi Zaimi, Kreşnik Çyapi (hamısı Albaniya).
Sumqayıt. Mehdi Hüseynzadə adına şəhər stadionu. Saat 20.00.

“Sumqayıt” tarixində üçüncü dəfə avrokuboklarda çıxış edəcək. İndiyə qədər bu turnirdə bir dəfə də mərhələ adlaya bilməyən “kimyaçılar” “Fehervar”la dueldə “şeytanın ayağını sındırmaq” istəyir. Bununla həm də Mehdi Hüseynzadə adına şəhər stadionunda növbəti tarixi uğur qazanıla bilər. Odu ki, Samir Abasovun komandası Macarıstan təmsilçisini məyus etmək üçün əlindən gələni əsirgəməməlidi. Hər halda, “Fehervar” “dişli” rəqibdi. 2018/19 “futbol ili”ndə Avropa Liqasının qrup mərhələsinə yüksələn komandanın avrokuboklar təcrübəsi yetərincə zəngindi. Keçmişdə “Real”, PSJ və “Mançester Yunayted” kimi nəhənglərlə meydanı bölüşən kollektiv son illərdə eniş yaşayır. Çox güman, bu, klubun sponsoru olan MOL-un (neft-qaz şirkəti) yaşadığı maddi çətinliklərlə bağlıdı. “Sumqayıt”da isə ab-hava yerindədi. “Doğma divarlar” amiliylə azarkeş dəstəyinin varlığı “kimyaçılar”ın şansını xeyli artıracaq. Hər halda, artıq 4000 bilet satılıb. Qonaqları isə cəmi 50 azarkeş dəstəkləyəcək.
Samir Abasovun təxmini start heyəti: Mehdi Cənnətov, Vüqar Mustafayev (k), Elvin Bədəlov, Rəhim Sadıxov, İsa Suliman, Murad Xaçayev, Nihad Əhmədzadə, Rövlan Muradov, Cordan Rezabala, Səbuhi Abdullazadə, Nikola Vuynoviç.

KƏNAN BAHADIR