''Liverpul''un məşqçilər korpusuna yeni isim əlavə olunub.

Klubdan verilən məlumatda qeyd olunub ki, Con Heytinqa baş məşqçi Arne Slotun köməkçilərindən birinə çevrilib. Amma ''Liverpul'' fanatları bu təyinatı heç də xoş qarşılaşmayıblar. Çünki Heytinqa futbolçu kimi ''qırmızılar''ın əzəli rəqibi ''Everton''un şərəfini qoruyub. O, 5,5 il ərzində ''Everton''un heyətində 140 rəsmi oyun keçirib. 40 yaşlı niderlandlı Heytinqa futbolçu kimi mərkəz müdafiəçisi qismində top qovub. ''Everton''dan başqa ''Ayaks'', ''Atletiko'', ''Fulhem'', ''Herta''da da çıxış edib və Niderland yığmasında 87 oyun keçirib.

Məşqçiliyə ''Ayaks''ın akademiyasında start verən və 2023-də yanvardan iyuna qədər əsas komandanı da çalışdıran Heytinqa ötən mövsüm ''Vest Hem''də Devid Moyesin köməkçisi kimi çalışmışdı.

ƏLİ