“Sabah” yeni mövsümə hazırlığı Sloveniyada davam etdirir.

Bilindiyi kimi, “bayquşlar”ın növbəti mövsüm üçün hədəfi azı ikincilikdisə, Konfrans Liqasında bacardıqları qədər irəli getmək niyyətindədilər. Bu məqsədlə çalışan komanda iyulun 10-da növbəti yoxlama matçını keçirib. “Bayquşlar” “Çukariçki” ilə qarşılaşıb. Maraq üçün xatırladaq ki, bu komanda Serbiya superliqasında sonuncu mövsümü 48 xalla 6-cı pillədə bitirib.

Masazır təmsilçisinin baş məşqçisi Krunoslav Renduliç bu start heyətinə güvənib.

1. Yusif İmanov, 44. Sofian Çakla, 3. Con İrasabal, 7. Boyan Letiç, 4. Elvin Camalov (k), 2. Amin Seydiyev, 13. İvan Lepinitsa, 10. Namik Ələskərov, 28. Kahim Parris, 70. Cesse Sekidika, 11. İshak Belfodil.

Ehtiyat oyunçular isə bunlardı: 55. Nicat Mehbaliyev, 22. Abdulla Rzayev, 6. Abdulla Xaybullayev, 33. Camal Cəfərov, 99. Neqoş Kupusoviç, 77. Şakir Seyidov, 17. Tellur Mütəllimov, 8. Ayaz Quliyev, 20. Coy-Lens Mikels, 5. Rəhman Daşdəmirov, 88. Xəyal Əliyev.

Bəli, “Sports park Radomlje”də keçirilən görüşdə hesab açılmayıb. Lakin bu, matçın qol vəziyyətləri baxımından kasad alındığı mənasına gəlmir. “Sabah”dan Parris, Belfodil, Namik və Cesse bir neçə dəfə fərqlənməyə yaxın olsa da, gah qapıçı, gah da qeyri-dəqiqlik məqsədə çatmağa mane olub. Əlbəttə, rəqib də izləyici qismində olmayıb. Serbiya təmsilçisi də “Sabah”la eyni taleni bölüşüb. Burda Yusifin bir neçə seyvi qeydə alınıbsa, bəzi zərbələrdən sonra top qapıdan aralı keçib. Ümumiyyətlə, matç gərgin rəqabət şəraitində keçib. Həmçinin “Sabah”ın heyətindən zədələnən futbolçu olmayıb.

Matçın birinci hissəsinə 2 , ikinci hissəsinə isə 4 dəqiqə əlavə olunub.

Qeyd edək ki, “bayquşlar” daha əvvəl yoxlama görüşündə Sloveniyanın “Koper”ini məğlub edib – 1:0.

KƏNAN BAHADIR