Bu oyunu “erkən final” adlandırmaq üçün hər cür əsas var idi.

Turnir ərəfəsində favoritlər sırasında göstərilən, eləcə də Avropa çempionatlarının ən titullu iki komandası 1/4 finalda üz-üzə gəldi. Düzdü, bu mənada ispanlar bir addım öndə idi. “Qırmızı qəzəb” bunaqədərki turnir məsafəsini birnəfəsə keçmişdisə, bundestim qrupun son oyununda İsveçrəyə xal vermişdi. 1/4 finalın ilk oyunu həm də turnirin ən məhsuldar iki komandasını üz-üzə gətirdi. Və daha bir maraqlı fakt: Almaniya 1988-ci ildən bəri rəsmi oyunlarda İspaniyaya qalib gəlməmişdi.

…Azarkeşlər və tamaşaçılar qarşılıqlı hücumlar şəraitində keçən maraqlı oyun izlədi. “Erkən final”da, yəqin ki, tərəflərdən heç biri məğlubiyyəti haqq etmirdi. Biz uzaqbaşı onları belə erkən mərhələdə qarşılaşdıran püşkü lənətləyə bilərik. Komandalar birlikdə 40 fola əl atdı, referi Entoni Teylor isə futbolçulara 15 sarı və 1 qırmızı vərəqə göstərdi. Oyunun lap əvvəlində ispanlar məcburi dəyişikliyə əl atdı – zədələnən Pedrini Olmo əvəzlədi. Məhz o, sonradan oyunun qəhrəmanı oldu. İspanlar fasiləyə qədər qapıya daha çox zərbə vursalar da, almanlar topla fırlanırdılar, ümumilikdə meydanda bərabər oyun gedirdi.

Fasilədən sonra “artıran” ispanlar dərhal iki təhlükəli vəziyyət yaratdı. Morata topu tirin üzərindən vurdusa, Olmo cərimə meydançası daxilindən dəqiq zərbə ilə hesabı açdı. Almanlar qol buraxandan sonra fəallaşdılar. Sonradan meydana çıxan Virtslə Füllkruq da onların oyununu canlandırdı. İspanlar sona yaxın bundestimin əl-qol açmasına imkan verdi. Belədə qol vəziyyətlərinin sayı artdı. Füllkruq topu dirəyə vurdu, Haverts topu Simonun üzərindən atsa da, “çərçivə”yə düşmədi. Hər halda, final fiti ərəfəsində hesab bərabərləşdi. Kimmix başla topu yerə saldı, Virts qapıçıya heç bir şans vermədi.

Belədə əlavə vaxt qaçılmaz oldu. De la Fuente həmin vaxt artıq Yamal, Uilyams və Moratanı meydandan almışdı. Ancaq ispanlar onlarsız da nəsə yaratmağı bacarır. İlk 15 dəqiqənin sonunda komandalar hərəyə bir şansı boşa verdi, 106-cı dəqiqədə isə Musialanın zərbəsindən sonra top Kukurelyanın əlinə dəysə də, Teylor “nöqtə”ni göstərmədi. Füllkruq daha bir real qol şansını qaçırandan sonra hər kəsə elə gəldi ki, qalib penalti seriyasında müəyyənləşəcək. Ancaq Olmonun asmasından sonra milli formada 2-ci qolunu vuran Merino fərqli ssenarini reallaşdırdı. Ardından Karvaxal meydandan qovulsa da, ispanlar qələbə hesabını qorudu. Mübarizəni dayandıran almanlar isə qol vəziyyətlərini qaçırdığına görə yalnız özünü qınamalıdı. De la Fuente də yarımfinal üçün start heyətini müəyyənləşdirmək üzərində baş sındırmalıdı.