Musa Qurbanlı "Qarabağ"a qayıtdı.

Ağdam təmsilçisi sabiq hücumçusuyla yenidən anlaşdı ki, budəfəki müqavilənin müddəti 3 ildi.

Həm də millimizin üzvü olan futbolçu ötən ilin iyulunda elə "köhlən atlar"dan ayrılıb İsveç "Yurqorden"inə keçmişdi. Həmin anlaşma növbəti dörd ili əhatə edirdi. Alınmadı və bizimkinin Skandinaviya macərası erkən başa çatdı.

Musanın "Yurqorden" karyerasını əvvəldən axıra qədər işıqlandırmışıq. Ümumi durumdan xırda detallara qədər hər şeydən xəbərdarıq. Onun ilk həftələrdə göstərdiyi canfəşanlıq bir müddət sonra, daha dəqiq desək, ötən mövsümün qış fasiləsindən sonra ciddi enişlə əvəzləndi. Bunu azarkeşlərin müntəzəm tənqidi müşayiət etdisə, baş məşqçinin Musanı ehtiyat oyunçular skamyasına məhkum etdiyini gördük. Bu baxımdan, Qurbanlının "Qarabağ"a qayıdışını geriyə addım kimi qiymətləndirmirəm. İndi onun həm avrokuboklarda, həm də premyer-liqada start heyətinin üzvü olmaq kimi böyük şansı var. Onu da qabartmalıyıq ki, "köhlən atlar" hazırda Avropa komandasıdı. Amma və lakin...

Heç kim inciməsin, amma Musa növbəti mövsüm premyer-liqanı bombardir kimi bitirsə belə, bunu uğur saymayacam. Ondan gözləntim "Qarabağ"a məhz avrokuboklarda böyük xidmətlərlə yardımçı olmasıdı. Transferin arxa pərdəsində hansı hadisələrin cərəyan etdiyini bilmirəm. O bəllidi ki, Musanı almaq üçün ağdamlılardan başqa rəsmi müraciət edən olmayıb. Belədə hücumçunun çiyinləri üzərinə ağır yük düşür. "Qarabağ"ın "jest"inə layiqincə təşəkkür etmək vacibdi. Çünki "köhlən atlar" azarkeşlərin tələb etdiyi Kadi Borgesdən və daha bir neçə tanınmış hücumçudan əvvəl Musanı transfer edibsə, hətta bu üzdən bir neçə gündü qınaq obyektinə çevrilibsə, hücumçu sabiq-yeni komandasının etimadına biganə yanaşa bilməz.

Xatırlayırsızsa, bir neçə ay əvvəl İsveç mətbuatı Qurban Qurbanovun uğurlarından bəhs edərkən Musanın "Yurqorden"dəki çıxışına toxunaraq atasına layiq olmadığını yazmışdı. İndi Musa daha əlverişli şəraitdə ümidləri doğrultmağa çalışmalı, bayaq qeyd etdiyimiz kimi, "Qarabağ"ın "jest"inə layiq olmaq üçün gecəsini gündüzünə qatmalıdı. Beləliklə, ağla gələn min suala bir cavabla aydınlıq gətirməlidi. Nə isə... Musa da həmişə arxayın olsun, Coşqun Diniyev də. Vay digər legionerlərimizin halına...


KƏNAN BAHADIR