Arif Əsədov millidəki taleyi haqda danışdı - iyulun əvvəli...
Bəli, futbol üzrə əsas millimizi Fernando Santuş çalışdıracaq.
Lakin hələ ki portuqaliyalının köməkçilərinin adına aydınlıq gəlməyib. Bu yöndə yerli məşqçilərlə bağlı danışarkən ilk ağla gələn Arif Əsədovdu.
"Football-plus.az" olaraq, mütəxəssislə əlaqə saxlayıb təyinatla bağlı fikirlərini öyrənməklə yanaşı, Santuşun köməkçisi olub-olmayacağı haqda məlumat aldıq:
"Bütün məsələlərə tezliklə, yəqin ki, iyulun əvvəlində aydınlıq gələcək. Çünki baş məşqçi hazırda Azərbaycanda deyil. Əlbəttə, belə mütəxəssislə çalışmaq təcrübə baxımından həmişə faydalı olar. Məncə, hər mütəxəssis bunu istəyər. Mənə köməkçi məşqçi kimi ehtiyac duyulsa, növbəti dəfə etimad göstərilsə, əlimdən gələni əsirgəmərəm. Milli üçün çalışmaq mənim üçün şərəfdi və hələ ki işimə davam edirəm".
Qeyd edək ki, Arif Əsədov 2020-ci ilin yayından millimizin köməkçi məşqçisidi. O, bu ilin martından Fernando Santuşun təyinatına qədər müvəqqəti baş məşqçi vəzifəsində çalışıb. Mütəxəssis yığmamızda Nikola Yurçeviç və Canni de Byazi kimi baş məşqçilərin köməkçisi olub.
KƏNAN BAHADIR
Digər xəbərlər
