“Turan Tovuz" premyer-liqanın ortabab komandalarından biridi.

Çox az sayda matç olar ki, onun haqda danışarkən “bozqurd”u aşkar favorit adlandıraq, rəqibin çətin sınaq qarşısında olduğuna işarə edək. Hər halda, komanda o qədər də güclü heyətə malik deyil. Düzdü, Tovuz camaatının futbol sevgisi, xüsusilə ev oyunlarında tribunalarda göstərdiyi fəallıq dillər əzbəridi. Ən azı ötən mövsüm stadionuna ən çox tərəfdar toplayan məhz “bozqurd”du. Özü də bu göstəricidə ikinci pillədə olan “Sumqayıt”ı, demək olar ki, ikiqat üstələməklə! Lakin komandanın mövsüm ərzində göstərdiyi oyun azarkeşləri tam qane etmədi. Yekun nəticələr komandanın avrokuboklara vəsiqə qazanmasına mane oldusa, baş məşqçi Ayxan Abbasov da yola salındı. İndi isə komandayla bağlı müxtəlif iddialar yayılmaqdadı. Amma buna keçid almamış bir neçə vacib məqamdan bəhs edək.

Bilindiyi kimi, “Turan Tovuz” ölkə futbolunda xeyli ilkin müəllifidi. Və buna zamanla yox, yarandığı gündən bəri imza atmaqla nail olub. Peşəkar klub kimi qeydiyyatdan keçən, farmklub araya-ərsəyə gətirən, mətbuat xidmətindən faydalanan, ölkəmizi avrokuboklarda, daha dəqiqi, UEFA kubokunda təmsil edən ilk komanda məhz “Turan Tovuz”du. Bəli, bu klub çox şey bacarıb. Şübhəsiz, azarkeşlərin indiki canfəşanlığının, gözünü komandanın üzərindən çəkməməsinin, hadisələrə daha səbirli yanaşmasının, qınamadan əvvəl müəyyən haqq-hesab etmələrinin, futbolçuları və məşqçiləri nəticədən asılı olmayaraq, bağrına basmalarının səbəbi kollektivdən məhz həmin illərin qoxusunu alması və yenidən tarixi uğurlara imza ataraq onları sevindirməsini gözləməsidi. Belədə 10 mövsümlük fasilədən sonra iki il əvvəl premyer-liqaya yüksələn kollektivdən gözləntilərin böyük olması anlaşılandı. Əlbəttə, bundan sonra da belə olacaq. Bu öz yerində. Bayaq söz verdiyim kimi, əsas məsələyə qayıdaq. İddialar...

Ayxan Abbasovun gedişindən sonra komanda üzvlərinin çoxuyla yolların ayrılacağı haqda xəbərlər yayıldı. “Turan Tovuz”un artıq bir neçə futbolçuyla müqavilə müddətini artırması bunun həqiqəti tam əks etdirmədiyini göstərdisə, təhlükə hələ sovuşmayıb. Növbəti məsələ isə klubun baş məşqçi tapmaqda çətinlik çəkməsidi. Deyilənə görə, ölkə daxilində ürəyincə mütəxəssis tapa bilməyən klub rəhbərliyi əcnəbilərə üz tutub. Bu dəfə də qarşı tərəf ağlasığmaz məbləğ “oxuduğundan” bizimkilər yenidən yerli məşqçilər tərəfə üz tutub. Məsələ nədən ibarətdi? Rəhbərlik dərk edir ki, yeni baş məşqçi Ayxan Abbasovan azı bir baş üstün olmalıdı. Olmalıdı ki, növbəti mövsüm avrokuboklarda iştirak etmək istəyən komanda məqsədə gedən yolda ciddi çətinliklə üzləşməsin. Əks halda, azarkeşlərin ciddi narazılığı ortaya çıxacaq ki, “ağ bayraq qaldırmaq” qaçılmaz olacaq. Belədə yeni mütəxəssis elə seçilməlidi ki, “gedənə rəhmət oxutdurmasın”. Bəs İdarə Heyətinin sədri Ehtiram Quliyev bunu nə dərəcədə bacaracaq? Çətin seçimin öhdəsindən gələ biləcəkmi?

Bundan sonra Tovuz təmsilçisinin daxilində hadisələrin necə cərəyan edəcəyi maraqlıdı. Çünki məhz yekun qərarlar Ehtiram bəyin doğru yolda olub-olmadığını sübut edəcək. Bütün suallara aydınlıq gəlməsi üçün yeganə çarə isə gözləməkdi. Biz, geniş miqyasda desək, futbol ictimaiyyəti olaraq, mövsüm ərzində az qala hər matçdan sonra “düzgün yoldayıq” deyən Şahin Diniyevi gözlədik. Nəyə nail oldu? Məqsədə çatdımı? Bunu bizə zaman göstərdi. İndi həmin suallar “Turan Tovuz”un rəhbərinə ünvanlanır. Ehtiram Quliyev düzgün yoldadımı? İki mövsüm ərzində həm nəticə, həm oyun tərzi, həm də komandanın keyfiyyət yönündə inkişafını təmin edən Ayxan Abbasovun göndərilməsi baha başa gələcək, yoxsa yeni baş məşqçi məhz həmin işləri daha yaxşı formada davam etdicəcək?

Bəli, mən indiyəqədərki uğurlarda Ehtiram bəyin əvəzsiz rolu olduğundan xəbərdaram. Klub həm də onun ayırdığı maliyyə sayəsində müəyyən irəliləyiş əldə edib və gələcək üçün iddialı planlar qurulub. Lakin bütün bunların nəticəsi özünü hansı yöndə və necə göstərəcək? Baayaq dediyim kimi, əsas sualın cavabı üçün gözləməkdən başqa çarə yoxdu.

KƏNAN BAHADIR