İyunun 6-dan 7-nə keçən gecə MBA-da final seriyası başladı.

“Football-plus.az” xəbər verir ki, bildiyiniz kimi, finalda “Boston”la “Dallas” qarşılaşır. Seriyanın ilk oyunu “Boston”un qələbəsi ilə bitdi. Luka Donçiçin 30 xal toplaması da “Dallas”ı məğlubiyyətdən xilas etmədi. Seriyanın 2-ci oyunu iyunun 10-da keçiriləcək.

“StatMuse” agentliyi MBA finalları ilə bağlı maraqlı araşdırmanın nəticəsini ictimaiyyətə açıqlayıb. Agentlik ilk oyundan sonra finalçıların qələbə şansını dəyərləndirib. Belə ki, final seriyasının ilk oyununda qalib gələn komanda 70 faiz hallarda sonda titulu da qazanır. Bundan başqa, ilk oyunda meydan sahibi olan komanda qalib gəlibsə, sonda titulu qazanmaq şansı 79 faizdi. Bütün bu məqamlardan o üzə çıxır ki, seriya “Boston”un qələbəsi ilə bitəcək.

Seriyanın ilk oyunu ilə bağlı daha bir maraqlı məqam var. “Dallas”ın sloveniyalı oyun qurucusu Luka Donçiç final seriyasındakı debüt oyununda 30 xal toplamaqla MBA tarixinə düşdü. Bunu sonuncu dəfə 1999-cu ildə Tim Dankan bacarmışdı.

Boston – Dallas 107:89 (37:20, 26:22, 23:24, 21:23)
Seriyada hesab – 1:0.