“Son mövsüm gözlənilməz surprizlərlə yekunlaşdı. "Neftçi"nin avrokubok şansını itirməsi gözlənilməz oldu. Ümumi dəyərləndirsək, çox maraqlı keçdi. Əsas iş bundan sonra başlayır. Çünki avrokuboklara vəsiqə qazanan klublar ölkəmizi layiqincə təmsil etməyi bacarmalıdı. Düşünürəm ki, heyətlərini gücləndirməsələr, Avropada onlara çətin olacaq. Bu fikri "Qarabağ"ı çıxmaq şərti ilə “Zirə”, “Sabah” və “Sumqayıt”a aid edirəm. Çünki "köhlən atlar" üçün fərqi yoxdu kim gəldi, kim getdi. Komandanın gücünə elə də təsir etmir, sistem yerində qalır. Əsas heyətin üzvlərindən olan Andrey Lunyovun göndərdilər. Düzdü, deyə bilmərik ki, top səviyyəli qapıçı idi, amma orta səviyyəli demək olar. İnanıram ki, Ağdam təmsilçisi ondan da yaxşısını tapa biləcək. Get-gəllər çox olacaq. Məsələn, "Səbail", məncə, heyətdə çox dəyişiklik etməyi düşünür. Onu deyə bilərəm ki, əsas heyətin futbolçularını buraxmaq heç də yaxşı hal deyil. Kökü saxlamaq lazımdı. Yaxşı komanda qurmaq hədəfin varsa, bu amilə diqqət yetirmək mütləqdi. Hər halda, maliyyə tərəfi böyük rol oynayır. Bu mövsüm tənqid hədəfi “ağ-qaralar” oldu. "Qarabağ"ı taxtdan salmaq istəyirsənsə, zaman, düzgün qərarlar, maliyyəni doğru bölmək lazımdı. Bu da qısa zamanda həll olunan şeylər deyil. Deyəcəklər ki, "Neftçi"yə neçə ildi vaxt verilib. "Qarabağ"ı taxtdan salmaq üçün düzgün strategiya, düzgün yanaşma və doğru məşqçi, maliyyə olmalıdı. Taxta qalxmaq mümkündü, amma orda qalmaq hər kəsin hünəri deyil. Təbii ki, mümkünsüz nəsə yoxdu. Fəqət hər klubda söz sahibi bir nəfər olmalıdı. Düşünürəm ki, 10 adamla, ayrı-ayrı qərarlarla bu mümkünsüz olacaq. Komandanı quran məşqçi olur. Bu seçimə xüsusi diqqət yetirilməlidi. Bir də var ki, klubun idman direktoru və idarə heyətinin sədri komandanı formalaşdırır. "Neftçi"də hələ ki heç bir iş düzgün işləmir. Bir qurum məsuliyyəti öz üzərinə götürüb, onun hesabatını verməlidi. Məncə, indiki halda "Neftçi"də nəyinsə düzələcəyinə ümid eləmək əbəsdi. Bir nəfər ortaya çıxmalı, bütün məsuliyyəti üzərinə götürüb işləməlidi. Avropaya yollanacaq qalan üç komandanın da yerinə yetirməli olduğu vəzifələr var. Hansısa klub qrup mərhələsinə düşməyi hədəfləyirsə, indiki heyətlə bacarmayacaq. Çox yox, bir-iki mərhələ irəliləyə bilərlərr. Məqsədə uyğun olaraq, maliyyə ayırmaq, düzgün hazırlaşmaq lazımdı. İndiki halda görünən odu ki, belə iddia yoxdu. Bəlkə də hamı dincəlir. 15 gündən sonra dəqiq deyə bilərik ki, hansı klub nə üçün oynayacaq. Yoxsa çempionata "Qarabağ"ı udmaq o demək deyil ki, avrokuboklarda mübarizə aparan hansısa komandanı məğlub edəcək potensiala sahib kollektivin var. Elə olsaydı, "köhlən atlar" la xal fərqi 20-30 olmazdı. Demək istəyirəm ki, hər komanda bir oyuna yaxşı hazırlaşa bilər. Amma bunun davamını gətirmək çətindi. Və hər mərhələ keçdikcə qarşına daha keyfiyyətli rəqiblər çıxacaq. Onlarla mübarizə aparmaq üçün komanadaların bəlli potensiala malik oyunçuları olmalıdı”.

“Son çempionat ümumilikdə maraqlı keçdi. Son turlar maraq dairəsində idi. İstərdim ki, komandalar çempionluq uğrunda da belə mübarizə aparsın. 2004-05-ci illərdə son tura kimi çempion bilinmirdi. Sevindirici hallardan biri odu ki, "Sumqayıt"ı yenidən avrokuboklarda görəcəyik. Komanda müəyyən qədər təcrübə yığıb. Düzdü, Ayxan Abbasovun dövründə də iki dəfə çıxış ediblər, amma təcrübəsiz idilər. Samir Abasov “Sumqayıt”ı ilk dəfə Avropaya çıxarsa belə, onun da, komandanın da yetərincə təcrübəsi var. Yəni nəsə nəticə gözləmək olar. Yaxşı olardı ki, "kimyaçılar" da, "Zirə" və "Sabah da bir-iki mərhələ ilə kifayətlənməsinlər. Əvvəllər "Qarabağ" və "Qəbələ" eyni vaxtda avrokubokların qrupunda çıxış edirdi. Azərbaycan futbolu adına uğur o olar ki, gələcəkdə digər rəqibləri ən azı "köhlən atlar"ın səviyyəsinə çatsınlar. İstər infrastruktur, istərsə də transfer məsələsində o şəkildə davam etsələr, nəticə olacaq. Həmçinin geridə qoyduğumuz mövsümdə həm 1-ci, həm də 2-ci liqanın oyunlarını sıx izləmişəm. Ötən illərlə müqayisədə fərqli, bir o qədər də maraqlı keçib. "Şamaxı"da Ramiz Məmmədov böyük iş gördü, komandanı premyer-liqaya qaytardı. "Qəbələ"nin 1-ci liqaya düşməsi məyusluq verdi. İnanıram ki, qısa müddətdə o komanda da elitaya qayıdar. 2-ci liqa və Region Liqası da sona qədər maraqlı keçdi. Transfer məsələsinə gəlincə, avrokuboklara vəsiqə qazanan klublar yaxşı transfer etməlidi. Nəticə üçün bu vacibdi. Baş məşqçilərə bu mövzuda dəstək verilməlidi ki, sonra da klub nəsə tələb edə bilsin”.