“Avrokuboklara yollanacaq 4 klubdan artıq üçünün adı bəllidi. 4-cü vəsiqənin sahibinin isə ya “Qəbələ”, ya da “Zirə” olacağı heç kimə sirr deyil. Hər bir kollektivin dəyişməyə və güclənməyə ehtiyacı var. Bu hər zaman belə olub və belə də davam edir. Fikrimcə, avrokuboklara yollanacaq komandalardan “Neftçi”yə transfer daha çox lazımdı. “Ağ-qaralar” qitəmiqyaslı turnirdə daha çox irəli getməyi, uğurlu çıxış etməyi düşünürsə, bəzi mövqelərə mütləq yeni futbolçular dəvət etməlidi. Düzdü, başqa klublara da transfer lazımdı. Ancaq “Neftçi” ilə müqayisədə onların oturuşmuş heyəti var, ehtiyat oyunçular skamyası bir qədər genişdi. Ümumiyyətlə, ümid edirəm ki, əvvəlki illərlə müqayisədə bu dəfə təmsilçilərimiz transfer siyasətində daha diqqətli davranacaq, daha səviyyəli oyunçulara müqavilə təklif edəcək. Premyer-liqada yerini qoruyan başqa klublara da transferlər lazımdı. Lakin onların vaxtı var və bu üzdən tələsik addım atmalarına ehtiyac yoxdu. Ümumiyyətlə, qış “transfer bazarı” ilə müqayisədə yayda klublar daha çox transfer etməyə üstünlük verir. Azad agent statusu daşıyan futbolçuların sayının çoxluğu da bazara təsir göstərir”.

“Başa çatmaq üzrə olan mövsümdə üzə çıxan 5-6 oyunçu oldu. Konkret ad çəkmək istəməsəm də, belələrinin olduğunu vurğulamaq lazımdı. Rəsmi olmasa da, Ramil Şeydayevin Asiyaya yollanacağı barədə məlumat yayılıb. Söylənilənlərə inansaq, Emin Mahmudovun da xidmətində maraqlı olan əcnəbi klublar var. Gənclərin arasında da diqqət mərkəzinə düşənlərin olduğu barədə xəbərlər yayılıb. Böyük ehtimalla bu istiqamətdə də fəallıq olacaq”.