İrqçi sorğu bundestimdə xoş qarşılanmadı
Almaniya yığması Yulian Naqelsmannın başçılığı altında doğma azarkeşləri önündə keçirəcəyi Avropa çempionatına hazırlığı davam etdirir.
“Football-plus.az” xəbər verir ki, baş məşqçinin qərarı ilə turnirdə bundestimin birinci kapitanı İlkay Gündoğan, ikinci kapitanı Coşua Kimmix, üçüncü kapitanı isə Tomas Müller olacaq. Eləcə də Manuel Noyer birinci, Mark-Andre Ter Ştegen isə ikinci qapıçı statusunda olacaq.
Bu arada Almaniyanın WDR kanalında yayınlanan “Sport İnside” adlı verilişdə aparılan sorğunun nəticələri ölkə futbol ictimaiyyətində, eləcə də yığma komandanın daxilində birmənalı qarşılanmayıb. Məsələn, sorğuda iştirak edənlərə “keçmişdə olduğu kimi Almaniya yığmasında daha çox ağdərili futbolçu oynasaydı, daha yaxşı olardımı” sualı ünvanlanıb. Bu suala insanların 21 faizi “bəli”, 65 faizi “xeyr” cavabını verib. Bundan başqa, sorğuda iştirak edənlərin 17 faizi yığmanın kapitanı İlkay Gündoğanın türkəsilli olmasının üzücü (!) olduğunu vurğulayıb. Bu olaya öncə Kimmix reaksiya bildirib:
“Bu məsələni komanda daxilində müzakirə etməmişik. Futbolun içindən çıxan hər kəs bilir ki, bu, çox mənasız mövzudu. Futbol dərisinin rəngi və inancı fərqli olan insanları birləşdirir. Bəzi futbolçular bu komandada yer almasa, onlar üçün çox darıxaram. Bu, irqçiliyin ən ağır formasıdı. Bu cür sorğu aparmaq normal deyil”.
Yığmanın çalışdırıcısı Naqelsmann da sorğunun nəticələrinə “od püskürərək” bunları deyib:
“Kimmix bu məsələyə çox düzgün yanaşıb. Bu, sadəcə, dəlilikdi. Aparıcıların küçələrdə insanlara yaxınlaşaraq onlara belə suallar ünvanlaması məni şoka salır. Mən də bunun irqçilik olduğunu düşünürəm. Biz başqa ölkələrə tətilə, istirahətə gedəndə digər mədəniyyətlərlə tanış oluruq. Amma sonra da başqa mədəniyyəti təmsil edənlərin ölkəmizə gəlişini pis qarşılayırıq? Çox qəribədi. Biz Avropa çempionatını ölkənin bütün vətəndaşları üçün keçiririk. Ümid edirəm ki, bir daha belə axmaq sorğuların nəticəsi ilə tanış olmaq məcburiyyətində qalmayacam”.
Təbii ki, İlkay Gündoğan da kənarda qalmayıb. Bundestimin 33 yaşlı türkəsilli kapitanı bunları deyib:
“Son bir neçə ayda, hətta son illərdə yaşanan siyasi hadisələrə nəzər salsaq, ölkədə belə sorğunun aparılması məni qətiyyən təəccübləndirmədi. Çox güman, bu, gələcəkdə də belə olacaq. Amma mən durumun yaxşılığa doğru dəyişəcəyinə ümidimi itirmirəm. İrqçilik problemi dünyanın bir çox yerində var. Hələ də insanlar arasında belə sorğuların keçirilməsi və onun nəticələrinə dəyər verilməsi üzücüdü”.
Digər xəbərlər
