Tayson – Pol döyüşü təxirə salındı
Sabiq mütləq dünya çempionu Mayk Tayson ilə bloger Ceyk Pol arasındakı boks döyüşü təxirə salınıb.
“Football-plus.az” xəbər verir ki, bu haqda xəbəri döyüşün təşkili ilə məşğul olan “Most Valuable Promotions” şirkətinin mətbuat xidməti yayıb. 57 yaşlı Taysonun mayın 28-də Los-Ancelesə uçarkən təyyarədə halının pisləşdiyini xəbər vermişdik. Ertəsi onun sağlıq durumu qaydasına düşmüşdü. “Most Valuable Promotions” şirkətinin mətbuat xidmətinin yaydığı məlumatda deyilir:
“Təəssüf ki, hər kəsin səbirsizliklə gözlədiyi Ceyk Pol ilə Mayk Tayson arasındakı döyüş təxirə salınıb. Həkimlər Taysona qarşıdakı bir neçə həftə ərzində minimal fiziki yükləmələr məsləhət görüb. Yalnız ondan sonra Mayk məşqlərə başlaya bilər. Mayk və Ceyk belə nəticəyə gəlib ki, döyüşə yaxşı formada başlamaq üçün ikisinə də bərabər şərait lazımdı. Döyüşün yeni tarixini iyunun 7-də açıqlanacaq”.
Xatırladaq ki, bu döyüşün iyulun 20-də Dallasda keçirilməsi planlaşdırılırdı.
