“Ötən mövsüm heyətimizdə olan legionerlərin, demək olar ki, hamısıyla yollarımızı ayırmağı düşünürük. Çünki onların maliyyə şərtləri 1-ci liqadakı büdcəmizə uyğun gəlmir. Amma bəzi müqaviləsi olan futbolçularımız da var ki, onlarla müqaviləni qarşılıqlı razılıq əsasında pozmaq üçün danışıqlar gedir. Komandanın əsasını ötən mövsüm heyətimizdə olan gənc futbolçular təşkil edəcək. Onların da əksəriyyəti akademiyamızın yetirmələridi. Komandanı tərk edən yerli oyunçular da var: Ülvi İsgəndərov və Urfan Abbasov. Birinci liqada oynamaq istəmədilərsə, biz onları məcbur edə bilmərik. Hər halda, özlərini bizim yanımızda görmədilər deyə, belə seçim etdilər. Onların hər ikisini də başa düşürük. Bundan sonra isə müqaviləsi olan yerli futbolçuların heç biri, demək olar ki, komandanı tərk etməyəcək. Onların müqavilə müddəti bitmişdi deyə, komandanı tərk etdilər. Amma yerdə qalan oyunçularla bəzi mövqeləri gücləndirməyi fikirləşirik. Bir də hücum xəttinə legioner transferi düşünürük. Ancaq elə transfer ki, sadəcə, bir mövsüm üçün olmasın. Yenə dediyim kimi, düşündüyümüz, qurduğumuz strategiyaya uyğun olaraq, perspektivli və potensiallı əcnəbilər dəvət etmək istəyirik. Ki, bir sonrakı mövsüm üçün də daha hazır vəziyyətə gətirib, uzunmüddətli əməkdaşlıq edə bilək”.