"Quba rayonunda görkəmli idman xadimi, beynəlxalq dərəcəli mərhum hakim Eldar Əzimzadənin 90 illiyi keçirildi. Tədbir AFFA-nın və Quba-Xaçmaz Regional Gənclər və İdman İdarəsinin dəstəyi sayəsində mümkün oldu. "Neftçi"nin veteranlarından Asif Əliyev, Hüseyn Məhəmmədov, Alim Qurbanov, İlqar Hüseynov, Novruz Əzimov, Maşallah Əhmədov, Kənan Kərimov, Rüstəm Rəhimov, Oktay Abdullayev, Şahin Cəfərov, Rafiq Quliyev gəlmişdi. Qubadan isə Malik Ağayev, Rəhim Ağayev, İlqar Şahmərdanov, Emin Əmiraslanov, Tural Cəlilov, Telman Dadaşov, Kamil Əsgərov, Bəhram Şahquliyev və Kamran Əlibabayev "Neftçi"yə qarşı oynadı. Çox maraqlı, gərgin keçən görüş 8:8 hesabı ilə bitdi. "Şimal"ın Region Liqasında kuboku qazanması və Avropada ölkəmizi təmsil edəcəyi ilə bağlı da tədbir keçirildi. Təbrik üçün ilk sözü Azərbaycanın Milli Qəhrəmanı Mehrab Niftəliyevin atası Zöhrab Niftəliyeva dedi. Kuboku ikinci dəfə "Şimal"ın rəhbəri Qılman İbrahimova təqdim etdi. Mayın 25-nə təsadüf edən Dünya Futbol Günü də qeyd olundu. Şəhidlərimizin xatirəsi birdəqiqəlik sükutla yad olundu. Meydança bayraqlarla bəzədilmişdi. Quba-Xaçmaz Regional Gənclər və İdman İdarəsinin rəisi Nəcəf Novruzov həm qonaqları, həm də "Şimal"ın oyunçularını və stadionun sahibi Gülağa Əliyevi hədiyyələrlə təltif etdi. AFFA tərəfindən diplomlar, şərflər verildi. Tam bir il öncə də mayda həmin veteranlar Qubaya gəlmişdi. Köhnə xatirələr yada düşdü. Oyundan sonra şam yeməyi verildi və xatirə şəkliçəkdirildi. İstərdim ki, bundan sonra şimal bölgəsində hər kəs "Şimal"ın ətrafında birləşsin, dəstək versin. Belədə komanda daha böyük uğurlara nail olacaq".