Dünən Qubada əsl futbol ab-havası yaşanırdı. “Neftçi”nin və Şimal bölgəsinin veteranları bir araya gələrək tanınan hakim, bir müddət “Şahdağ”ın rəisi vəzifəsin icra edən, sonradan hakim-inspektor kimi çempionat oyunlarına təyinat alan Akif Əliyevin 65 illik yubileyini qeyd edirdi.

"Football-plus.az" xəbər verir ki, rayonun Gənclər və İdman İdarəsinin təşkilatçılığı ilə keçirilən tədbirdən öncə Bakıdan gedən veteranlarla şimallı həmkarları üz-üzə gəldi.

Qonaqların heyətində Fərhad Vəliyev, Kamran Əlibabayev, Novruz Əzimov, Bəhram Şahquliyev kimi dövrünün tanınmış simaları çıxış edirdi. Rəqibin heyətində isə şimalın tanınmış futbolçuları çıxış edirdi. Saat 15.00-da başlayan matçın hakimi də məhz yubilyarın özü idi. İlk yarısı 2:2 hesabı ilə başa çatan matçın ikinci hissəsində də komandalar hərəyə iki dəfə fərqləndi ki, matçın yekun nəticəsi 4:4 oldu.

Onu da qeyd edək ki, fasilədən sonra Akif bəy fitini və vərəqələrini Qusardan olan hakim Alik Yunusova təhvil verib, oyunu kənardan izləyən İsgəndər Cavadov, Oqtay Abdullayev, Asim Xudiyev və Asif Əliyevin yanına gəldi. Şimal Regional Futbol Federasiyasının rəhbəri Abdulla Məmməmədov da matçı izləyənlər arasında idi.

Yubilyarın şərəfinə təşkil olunan yoldaşlıq oyunundan sonra yaşıl meydanı ziyafət zalı əvəz etdi. Təxminən 50-60 qonağın iştirak etdiyi tədbirdə şən musiqi, keçmişi yada salan şirin zarafatların öz yeri var idi. Məclisdə söz alan ölkə futbolunun canlı əfsanəsi Cavadov, Respublika Veteranlar İttifaqının prezidenti Abdullayev və şimal zonasının futbol təsərrüfatına cavabdehlik daşıyan Məmmədov yubilyarın şəninə sağlıqlar söylədilər, hakimlik karyerasına qiyabi ekskurs etdilər. Abdulla bəylə Oqtay bəy Əliyevə arxasında yığmanın “Akif Əliyev 65” yazılan formasını hədiyyə etməyi də unutmadı.
Gecəyə qədər davam edən ziyafətdə veteranların rəqsini, Oqtay bəyin zarafatlarını eşitməyə dəyərdi. Dünən gecə yaşı 60-ı ötən veteranlar sanki yenidən 20-25 yaşlı gənc olmuşdular...

RƏŞAD