Ötən həftəsonu, daha dəqiq desək, mayın 25-də “Qalatasaray”da prezident seçkisi keçirildi.

“Football-plus.az” xəbər verir ki, budəfəki seçkidə iki namizəd var idi. Bunlardan biri son başqan Dursun Özbək, digər isə Süheyl Batum idi. Professor və siyasətçi olan 69 yaşlı Batumun şansları elə də yüksək qiymətləndirilmirdi. Baxmayaraq ki, onu bəzi nüfuzlu müxalif qüvvələr, eləcə də sabiq başqan Ünal Aysal dəstəkləyirdi. Sürpriz baş vermədi. Açılan ilk sandıqlardan etibarən üstünlüyü ələ alan Özbək ümumilikdə 3-cü dəfə seçkidə qalib gəldi. Özü də tarixi bir nəticə ilə! O 3343, Batum isə yalnız 955 səs topladı. Özbəyin yeni idarə heyətində bu isimlər yer alacaq: Mətin Öztürk, Niyazi Yelkencioğlu, Bora İsmayil Bahçatepe, Sədat Artuoğlu, Eray Yazqan, Can Natan, Mehmet Cibara, Əli Yüce, İbrahim Hatipoğlu, Fatih Dəmircan. Göründüyü kimi, komandanın son illərdəki uğurlarında ən böyük pay sahiblərindən olan və son 2 mövsümdə başqan vəkili vəzifəsini icra edən Ərdən Timur yeni dönəmdə rəhbərlikdə yer almayacaq. Onu da bildirək ki, 3343 səs “Qalatasaray” tarixində rekord göstəricidi. İndiyə qədər heç bir prezident bu qədər səs toplamamışdı. Əvvəlki rekord 2011-ci il mayın 14-də keçirilən seçkidə 2298 səslə qalib gələn Ünal Aysala məxsus idi. Beləliklə, Dursun Özbək 2026-cı ilə qədər yenidən başqan vəzifəsini icra edəcək. Qısaca qeyd edək ki, 75 yaşlı Özbək 1988-ci ildən bəri turizm sektorunda fəaliyyət göstərir. Onun İstanbul, Ankara və Antalyada otelləri var. “Qalatasaray”da ilk dəfə 2014-cü ildə Duyğun Yarsuvatın dönəmində başqan yardımcısı olan Özbək 2015-ci ildəki seçkidə qalib gəlməklə klub tarixinin 36-cı prezidenti olmuşdu. 2018-ci ilin yanvarındakı seçkidə sürpriz şəkildə rəhmətlik Mustafa Cengizə məğlub olaraq bu vəzifədən çəkilməli olan Özbək 2022-ci ildə Burak Elmasa qalib gələrək yenidən camiənin başına keçmişdi. Onu da bilidrək ki, “Qalatasaray” Özbəyin dönəmində futbolda 6-cı titulunu qazandı. Komanda bu prezidentlə 2 çempionluq, 3 ölkə superkuboku və 1 ölkə kuboku qazanıb. Titul sayına görə Özbək Alp Yalmana çatdı. İndi o, klub tarixində bu göstəricidə yalnız Faruk Sürəndən (11) geri qalır.