Xəbər verdiyimiz kimi, "Turan Tovuz" baş məşqçisi Ayxan Abbasovla yollarını ayırıb. Əlbəttə, indiyə qədər ümumi tələblər baxımından mütəxəssisin vəzifəsinin öhdəsindən gəldiyini bilirik.

Bəs, ayrılığa səbəb nədi?

"Football-plus.az"a daxil olan məlumata görə, "bozqurd"un Abbasovla əməkdaşlığı dayandırmasının səbəbi uğursuzluq deyil. Belə ki, məşqçi "Neftçi"dən aldığı "yağlı" təklifə "yox" deməyib. Tərəflər arasındakı danışıqlar müsbət notlarla yekunlaşdığından qarşılıq razılıq əldə edilib.

Yaxın günlərdə keçiriləcək klubdaxili iclasdan sonra Ayxan Abbasov və "Neftçi" arasında rəsmi müqavilə imzalanacaq. Ona lazımi maliyyənin ayrılacağı söz verilibsə, tələb çempionluq olacaq.

Qeyd edək ki, sözügedən məşqçi "Turan Tovuz"dan əvvəl "Zirə" və "Sumqayıt"da çalışıb.

KƏNAN BAHADIR