Əminliklə demək olar ki, “Barselona” baş məşqçi Xavi Ernandeslə bağlı qərarını verib.

Kataloniya təmsilçisi 44 yaşlı mütəxəssislə yollarını ayıracaq. Rəhbərlik gələn həftə bu barədə onunla rəsmi görüş keçirəcək. Artıq yeni baş məşqçi də məlumdu. İspaniya nəhəngi almaniyalı Hans-Diter Fliklə anlaşıb, tərəflər ikiillik müqavilə imzalayacaq. Ancaq “blauqrana” incə bir məqamla üzləşib. Qanuna görə, “Barselona” vaxtından əvvəl vidalaşacağı Xaviyə təzminat ödəməlidi. Bu o deməkdi ki, ispaniyalı 2025-ci ilə qədər olan müqaviləsinin qalan müddətinin maaşını istəyə bilər.

“Mundo Deportivo”nun əməkdaşı Fernando Polonun sözlərinə görə, ispaniyalı gələn il üçün bütün maaşından imtina etməyə hazırdır, lakin bir nüans var. Xavi bütün köməkçilərinə işdən çıxmaq pulu ödənilərsə, təzminatdan imtina etməyə hazırdı. Baş məşqçi köməkçilərinə haqq etdikləri maaş verilmədikdə hansı problemlərlə üzləşə biləcəklərini anlayır. Buna görə də istəyir ki, onlar getməyə razılıq verməmiş ödənişlərini alsınlar. Xavi hələ də qovulacağına dair rəsmi bildiriş almayıb. O, hazırda vəziyyəti izləməklə məşğuldu.

Zəruri qeyd: “Barsa”nın saytı dünən günortadan sonra mövsümün sonunda Xavi ilə yolların ayrılacağını açıqladı. Artıq klub prezidenti ona 2024/25 mövsümündə komandanın baş məşqçisi olmayacağını bildirib...