Misli premyer-liqasının 36-cı turunda “Turan Tovuz” “Kəpəz”i məğlub edib - 1:0.

“Football-plus.az” xəbər verir ki, matçdan sonra qərblilərin baş məşqçisi Ayxan Abbasovun mətbuat konfransı keçirilib. Sizi onun fikirləri ilə tanış edirik:

- Gedəcək və yeni gələcək oyunçularla bağlı planınız hazırdı?
- Çempionat gedə-gedə beynimizdə fikirlər var idi. Amma yenə də son oyunu gözləyirdik. Rəhbərliklə görüşümüz olacaq. Futbolçu göndərmək asandı, gətirmək isə çətin. Dəyişiklik olacaq.

- Ehtiram Quliyev oyundan sonra bildirdi ki, növbəti mövsüm üçün qarşınıza avrokubok hədəfi qoyulub. Bununla bağlı düşüncələriniz necədi?
- Bu il də istəyirdik. Gələn il qarşımıza avrokuboklara vəsiqə qazanmağa cəhd etməyi məqsəd qoyacağıq. Amma rəqiblərdən asılıdı. Bu il avrokuboklara gedən komandaların təcrübəsi, oturuşmuş heyəti var. Biz də çalışırıq ki, belə möhkəm komanda yığaq.

- Artıq avrokubok mesajı verildi. Təzyiqin olacağı sizi çəkindirmir?
- Ehtiram müəllimlə görüşməmişəm hələ, bilmirəm hansı mesajı verib. Ötən mövsüm də basqı var idi. Tovuz azarkeşləri çılğındı. Sabah burada "Barselona" ilə oynasaq, yenə udmağımızı istəyəcəklər. Bu, yaxşıdı. Biz də onları sevindirməyə çalışırıq. Addım-addım getmək lazımdı. Hansı klublar tələsirdi, bu gün çempionatda yoxdu. Bölgələrdə bünövrəni çox möhkəm qurmaq lazımdı. Əsas komanda ilə kifayətlənmək olmaz. Bunlar olmasa, uğur müvəqqəti olacaq. İki illik təcrübəmiz var. Gələn il daha yaxşı olmaq üçün çalışacağıq.

- Əvəzedicilər liqasının ləğv olunması sizcə, Azərbaycan futboluna fayda verər?
- Klub prezidentindən sonra mənə sual vermək... Bizim inkişafımız üçün çox şeylər lazımdı. Tək əvəzedicilərin liqası ilə iş bitmir. Futbolun bünövrəsini qoymalıyıq. Özümüz özümüzü aldadırıq. Azərbaycandan kənara çıxanda görürük ki, çox geridəyik. Bu gün meydançalar yoxdu. Təlim-məşq bazaları olmasa, futbolun inkişafı tezliklə olmayacaq.

- Bakı Olimpiya Stadionunda "COP29"la bağlı tədbirlər keçiriləcək. Məşqləri harada edəcəksiz?
- Çox yaxşı sualdı. Özüm də bilmirəm nə edəcəyik. Bakıda 5-6 meydança var, onları da sökürlər. Bu o deməkdi ki, futbol olmasın. Uğursuz olan kimi məşqçini göndərirlər. Nə qədər məşqçini göndərəcəklər? Aşağıdan başlamalıyıq. İlk olaraq klublar meydançalar salmalıdı. Bundan sonra mütəxəssis axtarmalıyıq.