“İnter”in heyətində əla mövsüm keçirən, komandanın çempionluğunda heç də az rol oynamayan Hakan Çalhanoğlu “TRT Spor” kanalına açıqlamalar verib.

“Football-plus.az” xəbər verir ki, 30 yaşlı türkiyəli yarımmüdafiəçi 2023/24 mövsümündə meydana çıxdığı 39 rəsmi oyunda 15 qol, 3 məhsuldar ötürməlik performans sərgiləyib. Hakan A seriyasında “Atalanta”lı Teun Koopmayners və “Milan”lı Kristian Pulişiç ilə birlikdə mövsümün ən yaxşı yarımmüdafiəçisi nominasiyasına namizəd göstərilib. Türkiyə yığmasının da kapitanı və liderlərindən biri sayılan Hakan qarşıdan gələn Avropa çempionatı, “İnter”lə qazandığı skudetto və başqa məqamlar haqda danışıb:

*Bu, mənim üçün üçüncü qitə turniri olacaq. İlk ikisi çox da uğurlu keçməmişdi. İnşallah, bu dəfə uğurlu keçər. Mənim üçün mühüm bir turnir olacaq. Çünki yaxşı formadayam və komanda yoldaşlarımla birlikdə Türkiyə yığmasının heyətində isbat etməli olduğum bəzi şeylər var. Turnirə yaxşı başlamaqdan çox şey asılıdı. Yaxşı başlaya bilsək, davamını gətirəcəyimizə inanıram. Çox erkən toplanışa yolanacağıq. Məşqlərdə üzərimizdə çox çalışmalıyıq. Əlimizdən gələni edəcəyik.

* Ümumilikdə 6 və ya 7 oyun keçirmək tələb olunur. Yəni belə qısamüddətli turnirlərdə oyun yox, həmişə nəticə ön planda olur. Hər qarşılaşma bizim üçün final xarakteri daşıyacaq. Komandanın kapitanı olaraq hədəfimiz bəllidi. Almaniyada titulu başımızın üzərinə qaldırmaq istəyirik. Mən həmişə qarşıma ən yüksək hədəflər qoyuram.

* Çempionluq mənim üçün arzularımın reallaşması mənasını verdi. İtaliyaya 2017-ci ildə gəlmişdim. Burda keçirdiyim 7-ci mövsümdə, nəhayət, çempionluq mənə də qismət oldu. Uzun illər idi bu anı gözləyirdim. Tək mənim üçün yox, “İnter” üçün də birinci pilləni tutmaq önəmli idi. Çünki artıq formaya 2-ci ulduzu taxa biləcəyik. Bu il Avropada tək mən yox, Arda Gülər, Yunus Akgün, Kənan Yıldız da titullar qazandı. Çempionlıar Liqasının finalında hər klubun heyətində bir türkiyəli futbolçu yer alacaq. Nəhayət, bu seriyaya son qoyulacaq və ÇL türkiyəli futbolçuya da qismət olacaqq. Mən şəxsən buna çox sevinirəm. Kim güclüdüsə, o da qazansın. İkisi də mənim qardaşımdı. Onlara qarşı heç bir paxıllığım ola bilməz. ÇL-in finalında oynamaq çox gözəl duyğudu və ötən mövsüm mən bunu yaşadım.

* Həmişə düşündüyünü və hisslərini çəkinmədən dilə gətirən futbolçulardanam. Türkiyəli bir futbolçu Avropada karyerasına sanki 0:1 heridə başlayır. Bunun səbəbini bilmirəm. Bunu söyləyirəm ki, özümüzü kiçiltməyək. Əksinə, mən özümü dünyanın ən güclü mərkəz yarımmüdafiəçilərindən biri sayıram. Düzdü, Rodri və Kroos kimi futbolçular da var. Amma mənim onlarla müqayisədə yeganə mənfi cəhətim ÇL-i qazana bilməməyimdi. Bunu bir kənara qoysaq, özümü heç nədə onlardan zəif saymıram.

* Xaricdə oynasam da, burda özümə qarşı dəstək hiss edirəm. Hər kəs mənə sahib çıxır. Amma vətənimdə olanda eyni hissləri yaşamıram. Əksinə, özümü sanki yad bir yerdə hiss edirəm. Bu da mənim qəlbimə toxunur. Yığma ilə bağlı seçim etmək lazım gələrkən bir an belə tərəddüd etmədim. Hamımız gözəl bilirik ki, tərəddüd edənlər, hətta sonda başqa yığmalara üstünlük verənlər də var. Mən həmişə daha çətin olanı seçməyə çalışmışam. O vaxt mənə dedilər ki, Almaniyanı seçsəm, böyük transferlər edərək özümə güclü karyera quracam. Amma mən qəbul etmədim. Çünki Türkiyə bayrağı mənim üçün hər şeydən qiymətlidi. İstəyirəm ki, hər kəs bunu məhz belə də bilsin.

* Bir müddət öncə verdiyim açıqlama Türkiyədə yanlış anlaşılmışdı. Guya “Qalatasaray”a və Türkiyəyə gəlmək istəmədiyimi söyləmişdim. Amma mən uşaqlıqdan “Qalatasaray”lıyam. Sadəcə, bu şərtlər altında, yəni karyermın indiki mərhələsində Türiyəyə gəlmək istəmədiyimi dedim. Sadəcə, düşüncələrimi paylaşmaq istədim. Millətimiz isə yanlış anladı. Ya da hər kəs istədiyi kimi başa düşdü. Əslində ötən bazar günü “Qalatasaray” – “Fənərbaxça” derbisinə gəlmək istəyirdim. Amma həmin gün bizim də oyunumuz oldu. Oyundan sonra isə kuboku qaldırdıq. Bu üzdən gələ bilmədim.