Dünən İrlandiyanın paytaxtı Dublində UEFA-nın İcraiyyə Komitəsinin növbəti iclası keçirildi.

“Football-plus.az” xəbər verir ki, burda 2025/26 mövsümündə avrokubokların finalına evsahibliyi edəcək şəhərlərin adları bəlli oldu. Beləliklə, 2026-da ÇL-in finalı Budapeştdə, AL-in finalı İstanbulda, KL-in finalı isə Leyptsiqdə keçiriləcək. 2027-yə aid də bəzi detallar bəllidi. Məsələn, KL-in finalının İstanbulda keçiriləcəyi dəqiqdi. ÇL və AL-in finalının məkanı daha sonra bəlli olacaq. Həmin il üçün ÇL-in finalını keçirməyə əsas namizəd “San Siro”du. Amma bu, yalnız həmin vaxta qədər stadionda yenidənqurma işləri başa çatacağı təqdirdə mümkün olacaq.

Göründüyü kimi, UEFA Türkiyəyə güvənməkdə davam edir. 2023-də ÇL-in finalına evsahibliyi edən İstanbul qarşıdakı illərdə daha iki finalı qəbul edəcək. Konkret desək, söhbət “Beşiktaş”a məxsus “Tüpraş Stadionu”ndan gedir. Bu stadion 2026-da AL-in, 2027-də KL-in finalını qəbul edəcək. Bu məqamda xatırladaq ki, “Beşiktaş”ın stadionu yaxın keçmişdə artıq bir dəfə mühüm bir oyuna ev sahibliyi edib. Söhbət 2019-cu ilin Avropa superkubokundan gedir. Həmin vaxt həlledici görüşdə ÇL-in qalibi “Liverpul”la AL-in qalibi “Çelsi” üz-üzə gəlmişdi. “Qırmızılar” 120 dəqiqəsi 2:2-lik bərabərliklə bitən matçda penalti seriyasında üstün olmuşdular. Qeyd edək ki, Türkiyədən başqa 2026-da AL-in finalı üçün Almaniya, Rumıniya və Şotlandiya, 2027-də KL-in finalı üçün Almaniya, İsrail, Norveç və Şotlandiya namizədliyini irəli sürmüşdü. Türkiyə Futbol Federasiyasının prezidenti Mehmet Büyükekşi dünən daha bir maraqlı açqılama verdi. O bildirdi ki, inşası davam edən 45 minlik “Yeni Ankara Stadionu” vaxtında hazır olsa, 2027-də KL-in finalı “Tüpraş Stadionu”nda yox, məhz burda keçirilə bilər!