“Prinsiplər şəklində olan dayaqlar sarsıdılıb”
Rusiya Xarici İşlər Nazirliyinin, adətən, siyasi mövzularda açıqlamalarıyla gündəmə gələn sözçüsü Mariya Zaxarova “Sport-Ekspress” qəzetinə müsahibəsində idman dünyasında baş verən son hadisələrlə bağlı sualı cavablayıb:
“Mənə elə gəlir ki, şəxsiyyətlər haqda yox, qlobal miqyasda başverənlər haqda danışmaq lazımdı. Və sözün əsl mənasında olimpiya hərəkatı çökür - bunun aşkar əlamətləri və sübutları var. Bir çox görkəmli idmançılar, məşqçilər, funksionerlər və siyasətçilər, əlbəttə, başa düşürlər ki, dünya idman tarixi boyunca siyasət və idman bu və ya başqa şəkildə yaxın olub. Amma elə oyun qaydaları var idi ki, onları pozmaq olmaz. Həmin qaydalar olimpiya hərəkatının özünün toxunulmazlığı ilə bağlı idi. Olimpiya Xartiyasının toxunulmazlığı, olimpiya hərəkatının strukturlarının qurulduğu prinsiplərin qorunması: federasiyalar, hakimlik və s. və i.a.”.
Zaxarova həmçinin olimpiya hərəkatının gələcəyi ilə bağlı fikirlərini bölüşüb:
“Bir daha deyirəm: ayrı-ayrı süjetlər həmişə mövcud olub. Və çoxları bunlar haqda bilir, bəziləri hətta geniş ictimaiyyətə məlumdu. Olimpiya hərəkatı qlobal, ümumdünya irsi idi. Ancaq təəssüf ki, indi, fikrimcə, biz təkcə korroziya, metal yorğunluğu görmürük. Bəlkə də olimpizmin tam dağılmasına səbəb olacaq geridönməz bir proses başlayıb. Çünki prinsiplər şəklində olan dayaqlar sarsıdılıb və bəzi yerlərdə onlar artıq yoxdu”.
Ötən il dekabrın 8-də Beynəlxalq Olimpiya Komitəsi (BOK) Rusiya və Belarus idmançılarına Parisdə keçiriləcək Olimpiya Oyunlarında neytral statusda iştirak etməyə icazə verib. Bununla belə, idmançıların heç bir komanda yarışında iştirakı mümkün deyil.
“Tüpraş Stadionu”nun yeni rəqibləri peyda olub
“Beşiktaş”ın ev oyunlarını keçirdiyi “Tüpraş Stadionu”nun yeni rəqibləri peyda olub. Məlum olduğu kimi, bu stadion avrokubokların final matçını keçirməyə namizədlərdən biridi. Söhbət Avropa Liqası və Konfrans Liqasından gedir. Türkiyə Futbol Federasiyası hələ ötən il sentyabrın 23-də 2025/26 və 2026/27 mövsümləri üçün ya AL-in, ya da KL-in finalına evsahibliyi etməsi ilə bağlı “Tüpraş Stadionu”nun namizədliyini UEFA-ya göndərdiyini açıqlamışdı. Sözügedən turnirlərin finallarına namizədlər arasına daha iki stadion əlavə olunub. Almaniya Futbol İttifaqı AL-in finalı üçün Frankfurt şəhərindəki “Doytşe Bank Park”, KL-in finalı üçün isə Leyptsiq şəhərindəki “Redbull Arena”nın namizədliyinin UEFA-ya göndərildiyini açıqlayıb. Bununla da həmin illər üçün bu iki turnirin finalına evsahibliyi etmək istəyən şəhərlərin sayı 7-yə çatıb. Konkret desək, AL üçün İstanbul, Frankfurt, Qlazqo, KL üçün isə İstanbul, Leyptsiq, Qlazqo, Yerusəlim, Oslo və Cenevrə namizəddi. Xatırladaq ki, 2016-cı ilin aprelində istifadəyə verilən, 42590 yerlik və ötən ilə qədər “Vodafon Park” adlanan “Tüpraş Stadionu” artıq bir dəfə önəmli avrokubok matçına evsahibliyi edib. Belə ki, 2019-un avqustunda ÇL-in qalibi “Liverpul” ilə AL-in qalibi “Çelsi” arasında Avropa Superkuboku uğrunda oyun məhz bu stadionda keçirilmişdi. 2:2 hesabı ilə bitən həmin oyunda “Liverpul” penalti seriyasında üstün olmuşdu.
Digər xəbərlər
