“Edmonton” son üç ildə 2-ci dəfə konfrans finalında!
MHL-də sonuncu yarımfinal seriyası da başa çatıb.
“Football-plus.az” xəbər verir ki, “Vankuver”i seriyanın 7-ci oyununda məğlub edən “Edmonton” Qərb konfransının finalında “Dallas”a rəqib olub. Ümumiyyətlə, “neftçilər” son üç ildə 2-ci dəfə konfrans finalında oynayacaq. Onlar 2022-ci ildə Qərbin finalında “Kolorado”a 0:4 hesabıyla uduzmuşdu.
“Edmonton” MHL tarixinə pley-offun ilk iki mərhələsində üç oyunçusu 20 xal toplayan ilk komanda kimi düşdü. “Oylerz”in heyətində hücumçulardan Konnor Makdevid 21 (2+19), Leon Drayzaytl 24 (8+16) və müdafiəçi Evan Buşar 20 (5+15) xalla yadda qaldı.
Müdafiəçi Buşarın nəticəsini cəlbedici edən daha bir məqam var. İş ondadı ki, o, MHL tarixinə pley-offun ilk iki mərhələsində 20 xal toplayan ilk müdafiəçi kimi düşdü. 24 yaşlı kanadalı 12 oyunda, yuxarıda da vurğuladığımız kimi, 5 qol və 15 məhsuldar ötürmə ilə yadda qalıb. Müntəzəm çempionatda keçirdiyi 81 oyunda isə 82 (18+64) xal toplayıb.
Bu arada Konnor Makdevid seriyanın 7-ci oyunu ilə bağlı fikirlərini bölüşüb:
“Vankuver” kimi səviyyəli komandaya qalib gəlmək əla nəticədi. Onların möhtəşəm komandası var. Elə yaxınlarda “Vankuver”ə mövsümün ilk matçında necə 1:8 uduzduğumuzu müzakirə edirdik. Bu üzdən qalib gəlməyimiz yerinə düşdü. Seriya gərgin, emosional axarda keçdi. Hər iki klubun azarkeşləri az qala ağlını itirəcəkdi”.
Makdevid konfrans finalında qarşılaşacaqları “Dallas”la bağlı gözləntilərini də bölüşüb:
“Dallas” əla komandadı. Konfrans finalında həmişə güclü rəqiblə qarşılaşırsan, “Starz” da məhz belələrindəndi. Onlar bəlkə də MHL-də ən dərin ehtiyat oyunçular skamyasına malikdu. Bizi əla sınaq gözləyir və biz bu çağırışa hazırıq”.
Beləliklə, konfrans finalında qarşılaşacaq cütləri bir daha xatırladırıq. Şərq konfransının finalında “Reyncers”lə “Florida”, Qərbin finalında isə “Dallas”la “Edmonton” üz-üzə gələcək. “Reyncers” – “Florida” seriyası mayın 23-də Nyu-Yorkda start götürəcək. “Dallas”la “Edmonton” seriyaya ertəsi başlayacaq. İlk oyun “Starz”ın ev arenasında keçiriləcək.
21 may
Vankuver – Edmonton 2:3 (0:0, 0:3, 2:0)
Seriyada hesab – 3:4.
Digər xəbərlər
