“Bütün matçları izlədim. "Sabah"la "Sumqayıt" arasında bərabər səviyyəli oyun gedirdi. "Sabah" həm ev sahibi, həm də xala daha çox ehtiyacı olduğundan daha üstün görünürdü. Amma təhlükəli vəziyyət yarada bilmədilər. "Sumqayıt" isə bəxtsizlikdən birinci qolu öz qapısında gördü. Ondan sonra "bayquşlar" görüşü istədiyi kimi sonlandırdı, nəticəyə oynadı. Hakimlik barəsində bu il çox danışıldı. "Sumqayıt"ın haqqını tapdamaq istəmirəm. Çünki "kimyaçılar" maraqlı, baxımlı futbol oynayır. Bəzi komandalardan həm büdcə, həm də heyət baxımından üstündülər. Bu yerə qədər layiqli xallarını yığaraq gəlib çatıblar. Onların bu uğuruna kölgə salmaq əvəzinə alqış düşür. Əcnəbi hakimlərin olması bəlkə də reaksiyaların az olmasına səbəb oldu. Çünki hakimlər - həm VAR-da oturanlar, həm də meydandakılar cari mövsüm yetərincə bərbad oyunlar idarə edib. O qədər gülməli səhvlər edirlər ki, normal idarə edəndə də artıq emosiyalar yaranır. 35-ci turda əcnəbilər olduğundan həm məşqçi, həm də futbolçular tam sakit qala bildilər. Hakim amili, doğrudan da, öz təsirini göstərdi”.

“Sumqayıt" bu il “boyundan yuxarı tullanır”, "Sabah" isə tam əksinə, son turlara qədər asılacaqda qalmamalı idi. Çempionatda belə heyət, infrastruktur cəhətdən əlindəki imkanlarla üst pilləni çoxdan təmin etməliydilər. Yeni baş məşqçi gəlib, oyunlarda yaxşı nəticə əldə edirlər. Buna baxmayaraq, mən onların kifayət qədər maraqlı və baxımlı oyun oynadıqlarını düşünmürəm. "Sabah" istənilən vəziyyətdə deyil. Son turda "Neftçi" ilə görüşdə onları çətin bir matç gözləyir. Düzdü, "Neftçi" də bu il normal çıxış etməyib. Bu iki komandadan biri avrokuboklardan kənarda qalacaq”.