“Xeyli sayda tamaşaçı gəlmişdi. Oyundan öncə konsert proqramı, oyundan sonra uduşlu lotereya təşkil olundu. 41-ci dəqiqədə vurduğumuz qolu hakim saymadı. Səbəb kimi isə topun oyunçunun əlinə dəydiyini göstərdi. Sosial şəbəkədə də videolar yayılıb. Rəqibin qapçısı topu çıxararkən öz oyunçusuna dəyir və bizim oyunçumuz topu tora qovuşdurur. Sadəcə, yan xətt hakimi əlinə dəydiyini bildirdi. Həm futbolçular, həm də azarkeşlər bu qərarı aqressiv qarşıladılar. 4000-ə yaxın azarkeşin qarşısında oyun aparmaq asan deyil. Təzyiq var və bunu başa düşürük. Oyunun baş hakiminə də təzyiqlər oldu, 10-15 dəqiqəlik oyun dayandı. Azarkeşləri sakitləşdirdikdən sonra oyun qaldığı yerdən davam etdi. Çox təəssüf ki, hesabı açmaq mümkün olmadı. Çempionluq əldən getsə də, mübarizəmiz davam edir. Qarşıda iki oyunumuz var. İcraiyyə Komitəsinin qərarını gözləyirik. Ondan sonra bütün məsələlərə aydınlıq gələcək. Komanda sayı artsa, bizim şansımız daha çox olacaq. Bir komanda çıxsa, 1-ci liqada mübarizəmizi davam etdirəcəyik. Birinci yer uğrunda şansımız bitsə də, premyer liqa uğrunda şansımız bitməyib. Çempionatın marağı ondadı ki, sonuncu tura qədər çempion bilinmir. Elitada və 2-ci liqada çempionlar bilinsə də, görünür ki, 1-ci liqada gərgin mübarizə gedir. Çox maraqlı bir çempionat oldu”.