Mayın 8-9-da keçirilən oyunlarla futbol üzrə ölkə çempionatının 1-ci liqasında 25-ci tura yekun vuruldu.

Ortababların və çempionluğa iddialıların duelində hesab açılmadısa, “Şamaxı” və MOİK rəqiblərini meydana çıxmağına peşman etdi.

“İrəvan” – “Difai Ağsu” matçında hərəyə 1 xal düşdü. “Sülh” meydan sahiblərinin durumunu yaxşılaşdırdı. Ardıcıl ikinci matçda məğlub olmayan komanda turnir cədvəlinin təhlükəli zonasından uzaqlaşdı. Öz aramızdı, deyəsən, Nazim Süleymanov komandanı toparlayır. Qonaqların işi isə çətinə düşdü. Belə getsə, Elgiz Kərəmlinin kollektivi 2-ci liqanın ikincisiylə pley-offa çıxmalı olacaq. MOİK-in “Araz Saatlı”nı darmadağın etməsi gözlənilən idisə, “Şamaxı” “İmişli” və “Qaradağ Lökbatan” kimi güclüləri yoran “Karvan”ı böyük hesbla məğlub etməklə çoxunu təəccübləndirdi. İndi “şirlər”in çempionluq şansı xeyli artıb! Turun mərkəzi, yəni “İmişli” – “Qaradağ Lökbatan” matçında isə mövsümün fiaskosu yaşandı. İnqilab Məmmədovun təmiz qolu saymamaqla meydan sahiblərinin premyer-liqa ümidlərinə son qoydu. Bununla da Əsgər Abdullayev və komandasının əziyyəti puç oldu desək, yanılmarıq. Azər Həşimovun komandası isə son 1 xalla “əlini” daha da gücləndirdi! Tura “Zaqatala” – “Mingəçevir” oyunuyla yekun vuruldu. Qolsuz başa çatan qarşılaşma nəticə baxımından ciddi dəyişikliyə səbəb olmadı. Onsuz da bu komandalar heç bir hədəf uğrunda mübarizə aparmır.

Beləliklə, bu oyun həftəsi “İmişli”nin şansının üstündən xətt çəkdi, son iki tura iki çempionluğa namizəd saxladı. Bundan sonra “Şamaxı” və “Qaradağ Lökbatan”ın şansları üzərində dayanmağa məcburuq! “Araz Saatlı”nın 1-ci liqanı tərk edəcəyi də çoxdan bəllidi.

1. Qaradağ Lökbatan 25 15 8 2 42-16 53
2. Şamaxı 25 14 9 2 54-19 51
3. İmişli 25 13 8 4 36-17 47
4. MOİK 25 13 6 6 50-26 45
5. Karvan 25 11 5 9 31-31 38
6. Zaqatala 25 6 9 10 28-32 27
7. İrəvan 25 8 3 14 28-49 27
8. Mingəçevir 25 7 5 13 18-36 26
9. Difai Ağsu 25 5 6 14 31-41 21
10. Araz Saatlı 25 3 1 21 25-76 10
Bombardirlər: Elmir Rəhimzadə (MOİK) – 16, Elşad Tağıyev (Şamaxı) - 15 qol.

Növbəti turun oyunları mayın 15-16-da keçiriləcək: Difai Ağsu – MOİK, Zaqatala – İrəvan, Karvan – Mingəçevir, Qaradağ Lökbatan – Şamaxı, Araz Saatlı – İmişli.

KƏNAN BAHADIR