“Qarabağ” niyə “Neftçi”ni hər oyunda “kötəkləyir”?
Növbəti Azərbaycan derbisi, növbəti darmadağın, növbəti hegemonluq - bir sözlə, “Neftçi” Ağdam təmsilçisiylə heç cür bacara bilmir.
Artıq elitanı tərk edəcəyi dəqiqləşən “Qəbələ”nin belə indiki durumunda “Qarabağ”dan xal aldığı bir vaxtda “ağ-qaralar” rəqibinə müqavimət göstərə bilmir. Mövsümün sonuna 8 tur qalmış çempionluğu elan edən “köhlən atlar” son 3 görüşdə ardıcıl xallar itirsələr də, bunun acığını “Neftçi”dən çıxdılar. Bəs səbəb nədi? “Qarabağ”ın futbolçularının bəlkə də ən motivasiyasız vaxtında bu komandaya müqavimət göstərməyə nə mane olur? Cari mövsümdə kubok və çempionat oyunları qarışıq qapısından 21 top buraxıb, əvəzində cəmi 2 top vurmaq hansı “derbi” anlayışına sığır? Azərbaycanın futbol ictimaiyyəti “Neftçi”nin hər dəfə “Qarabağ” önündə əzilməsini necə qiymətləndirir?
Anar Şabanoğlu (jurnalist):
"Qarabağ" Azərbaycandakı istənilən rəqibi böyük hesabla məğlub edəcək potensiala malikdi. Çempionluğu çoxdan qazansa da, motivasiyası azalsa da, fərq etmir. Düzgün idarəçilik, işə vicdanlı münasibət yekunda bu komandanın rəqibləri ilə arasında uçurum yaradıb. Düşünürəm ki, "Qarabağ"ın ikinci heyəti belə ölkəmizdəki istənilən klubu darmadağın edə bilər”.
Aslan Kərimov (mütəxəssis):
“Hesab edirəm ki, “Qarabağ”ın son üç oyundakı problemi motivasiya məsələsi deyildi. Oyunçuları motivasiyasız görmürdüm. Sadəcə, səhvlərə yol verirdilər. “Neftçi”ilə “Qarabağ”ı müqayisə etmək düzgün olmazdı. Son 10 ildə “Qarabağ”ın təcrübəsi, oyunçuların keyfiyyəti “Neftçi”dən daha üstündü. “Ağ-qaralar”ın məğlub olması böyük sensasiya deyil. “Neftçi” qırmızı vərəqə almasaydı, toplardan birinin əvəzini çıxq bilərdi. Qırmızı vərəqədən sonra şansı yox idi. “Qarabağ”ın cinah oyunçuları mərkəz müdafiəsi ilə cinah müdafiəsi arasındakı zonalarda “Neftçi”yə həddən artıq başağrı yaradırdılar. Demək olar ki, qolların hamısı o istiqamətdə keçiddən sonra oldu. Bu zonaları həm müdafiəçilər, həm də lazım olanda hücumçular doldurur. “Qarabağ” bunu çox yaxşı edə bilir. Bunun da qarşısını almaqda “ağ-qaralar”ın müdafiə xətti aciz idi”.
Emil Şükürov (skaut):
“Əslində oyunların xronologiyasına baxsaq, səhv etmirəmsə, mövsümün birinci yarısında komandalar arasında iki dəfə 2:0 hesabı qeydə alınmışdı. “Qarabağ” həmin vaxt formasının zirvəsində deyildi. İndi isə mövsümün sonudu və sona yaxınlaşdıqca da Ağdam təmsilçisinin enən qrafiki var. Bununla yanaşı, “Neftçi”nin də vacib matçlarda darmadağın olması klub adına yaxşı hal deyil. Qışdakı məşqçi dəyişikliyi, heyətin qeyri-sabitliyi, məşqçinin futbolçularla anlaşması - belə məqamlar komandaya təsirsiz ötüşmür. Həm də “Qarabağ”ın çempionluğu təmin edəndən sonra daha rahat oynamasını da göstərmək olar. “Ağ-qaralar” da isə bu əksinədi. Çünki “Sabah”, “Zirə”, “Sumqayıt” kimi komandalarla 2-3-cü yerlər uğrunda mübarizə aparır. Düşünürəm ki, burda təkcə “Qarabağ”dan xal almaqdan söhbət getmir. Hazırda iddialı 4 komanda arasında xal itirməməkdən ötrü real yarış gedir. İnanıram ki, “Neftçi” son turlarda toparlanacaq, qarşıya qoyulan məqsədə çatacaq”.
KAMAL SƏFƏR
Digər xəbərlər
