“Sabah” Misli premyer-liqasının 30-cu turunda evdə “Qarabağ”ı məğlub etdi – 3:2.

Oyundan sonra ağdamıların müdafiəçisi və kapitanı Bədavi Hüseynov “Futbol+”in suallarına cavab verdi.

- Oyunu necə şərh edərdin, qırılma nöqtəsi harda idi?
- Ümumilikdə matç pis keçmədi. Birinci yarıda deyərdim ki, bərabər səviyyədəydik. Qol şansları yaratsaq da, istifadə edə bilmədik. Rəqib əks-hücumlar quraraq qapımızdan iki top keçirməyi bacardı. İkinci hissədə də üstünlük bizdə idi, rəqibi sıxdıq. Şanslardan istifadə edə bilmədik. Çətindi belə bir məğlubiyyət almağımız. Amma biz peşəkar səviyyədə oyuna hazırlaşırıq. Hər dəfə meydana eyni ruhda, qələbə üçün çıxırıq. Bəzən də bəxtimiz gətirmir. Soyuqqanlı ola bilərdik. "Sabah"ın üçüncü qolu vurması belə sonluğa səbəb oldu. Çalışacağıq ki, növbəti turlarda bu səhvlərə yol verməyək.

- Üçüncü qoldan əvvəl Belfodilin dirsəyi səni zədələdi, ağzın qanadı. Hakimin həmin epizodda oyunu dayandırmaması ilə bağlı nə deyərdin?
- Bəli, “Sabah”ın üçüncü qolunda təmiz qayda pozuntusu vardı. Amma hakim onu vermədi. Nəsə deməyimiz nəticəni dəyişmir. Bu barədə də çox şey danışmayacam. Hər şey aşkar görünürdü. Hakim səhvi olmasaydı, nəticə fərqli olardı.

- Bəli, "Sabah" güclü rəqibdi. Amma bu dəfə bəxtimiz gətirmədi. Birinci yarıda yaratdığımiz şanslar qolla nəticələnsəydi, oyun fərqli hesabla bitərdi. Təbii ki, "Sabah"ın əziyyətini yerə vurmaq istəmirəm. Çünki güclü komandadı. Həmişə onlarla oyunlarımız maraqlı keçir. Rəqibi təbrik edirəm. Bu futboldu, kim çox qol vurur, o qazanır. Keçmiş oyunlarımız da fərqli nəticələrlə bitib, bu gün belə alındı.

- Çempionluğu təmin etmisiz, kubokdan danışaq. Qarşıdan "Neftçi" ilə cavab oyunu gəlir. Cavabın ağır gələcəyini gözləmirsiz?
- Bəli, ona hazırlaşırıq. Güclü mübarizə gedəcək. Çünki itirməyə heç nə yoxdu, 0:4 uduzublar. Hücumameyilli futbol oynayacaqlar. Biz gərək ilk oyunu unudaq. Elə bil ki, hesab sıfır-sıfırdı. Yaxşı hazırlaşmalı, mübarizə aparmalıyıq.

- Finalda rəqibinizin "Zirə", yoxsa "Qəbələ" olmasını istərdiz?
- Bizim üçün fərqi yoxdu. "Qəbələ" kubokda tam fərqli oynayır. Çempionatda "Zirə" güclü rəqibdi. Bu barədə ciddi düşünmürəm də. Çünki qarşıda cempionat oyunlarımız var. Finala çıxandan sonra o barədə fikirləşə bilərəm.

RÖYANƏ OĞUZ