Meydan sahibləri avrokuboklara iddialıdısa, qonaqlar da elitada yerini qorumağa çalışır.

“Bayquşlar”ı meydana yeni baş məşqçi Krunoslav Renduliç çıxarmışdı.

İlk dəqiqələrdən etibarən meydan sahibləri topa nəzarəti ələ aldı. Elə bu üstünlükdən 19-cu dəqiqədə yararlandılar. Ayaz Quliyevin cərimə meydançasına ötürməsini Davit Volkov tamamladı - 1:0. Cəmi 7 dəqiqə sonra Parrisin cərimə zərbəsindən qapı qarşısına ötürməsini Çakla tamamlasa da, ofsayd bayrağı havada idi. Bu qərara görə ruhdan düşməyən Masazır təmsilçiləri ardıcıl hücumlar qurmağa başladı. Volkov 41-ci dəqiqədə Sekidikanın gözəl ötürməsini qola çevirdi - 2:0. Son vaxtlar “kölgəyə çəkilən” gürcü hücumçu bu matçda dubl etməyi bacardı. İlk hissəyə artırılan 3-cü dəqiqədə Nicat Mehbaliyevin qeyri-dəqiq ötürməsindən “qırmızı-qaralar”ın belçikalı yarımmüdafiəçisi Allaş yararlana bildi - 2:1. İkinci yarıya qonaqlar fəal başlasalar da, çoxlu qol imkanını boşa verdilər. “Qəbələ”nin futbolçuları həm yorulmuş, həm də aqressivləşmişdi. 64-cü dəqiqədə Auaşeriyanın qapıya doğru zərbəsində azca dəqiqlik çatmadı. Sona yaxın Emil Səfərov uzaqdan topu qapıya yönəltsə də, Nicat Mehbalıyev yerində idi. Son saniyələrdə qonaqlar cərimə zərbəsi qazandı. Ülvi İsgəndərovun qapı qarşısına ötürməsində topun Da Silvanın əlinə dəydiyi şübhəsi olsa da, İnqilab Məmmədov belə düşünmürdü. Beləliklə, Renduliç ilk matçda qələbə qazandı. Bu nəticə turun sonunda komandanın üç pillə irəliləməsinə və avrokuboklara vəsiqəyə iddialılar sırasına qoşulmasına səbəb oldu.

Gözdən qaçmadı
* “Qəbələ”nin qapısına vurulan ilk qoldan sonra “Red Black Army” azarkeş qrupu bir müddət səssizliyə düçar oldu.
* 78-ci dəqiqədə top media sektoruna tuş gəldi.

ƏSƏD SEYİDOV