Futzal üzrə yüksək liqada 2023/24 mövsümünün çempionu bəllidi. “Araz-Naxçıvan” 17-ci turda ən yaxın izləyicisi “Neftçi”ni məğlub edərək (5:4) qızıl medalların sahibinə çevrildi.

“Qırmızı-ağlar”ın baş məşqçisi Vitali Borisovla əlaqə saxlamağı lazım bildik. Təcrübəli mütəxəssislə söhbətdə son uğur, növbəti hədəflər, yığma ilə bağlı planlar, futzalımızın bugünü kimi mövzulardan söz açdıq.

– Əvvəlcə sizi və komandanızı çempionluq münasibətilə təbrik edirik. Təəssüratınızı bilmək istərdik...
– Təşəkkür edirəm. Bu, mənim məşqçi kimi ilk çempionluğumdu. Çox xoşbəxtəm və öz növbəsində komandam da növbəti dəfə çempion olduğuna görə özünü əla hiss edir. Sizin vasitənizlə bir daha oyunçularıma, tibbi və inzibati qərargahıma böyük minnətdarlığımı bildirmək istəyirəm. Bəli, futbolçu kimi “Araz-Naxçıvan”ın heyətində dəfələrlə çempion olmuşam. Amma bu hissi məşqçi kimi dadmaq çox fərqlidi. Sevincliyəm.

– Mövsümün əvvəlindən bəri istər mütəxəssislər, istərsə də azarkeşlər favorit komanda kimi məhz “qırmızı-ağlar”dan bəhs edirdi. Yüksək liqanın vəziyyəti elədi ki, hansısa sürpriz olmadıqca ən iddialı komanda məhz sizinkidi. Üstəlik erkən çempion olduz. Belə vəziyyəti necə şərh etmək olar?
– “Araz-Naxçıvan” uzun illərdi həm milli, həm də əcnəbi futzalçıların düzgün seçilərək transfer edilməsi sayəsində Azərbaycanın nəhəngidi. Burda çalışan hər bir şəxsin qələbələrimizdə böyük payı var. İctimaiyyətin bizi favorit görməsi və dəstəkləməsi xüsusi ruh verir və daha məsuliyyətli olmağa vadar edir. Lakin hər şeyin asan olduğunu deməzdim. Çünki az da olsa, ciddi rəqiblərimiz var və bizimlə qarşılaşmalara fərqli motivasiya ilə hazırlaşırlar. Xatırlayıram ki, ikinci dövrədən sonra ən yaxın izləyicimizlə aradakı xal fərqi 1 idi.

– Bəli, amma nəticə dəyişmədi. Son sözü komandanız dedi. Təəssüf ki, yüksək liqada uzunömürlü mübarizə mühiti formalaşmır. Çıxış yolunu nədə görürsüz?
– Yenə deyirəm, bizim üçün asan olmadı... Məncə, “Araz-Naxçıvan”, “Neftçi” İK və “Baku Fire” kimi komandaların sayı daha çox olmalıdı. Belədə səviyyə daha da yüksələ bilər.

– Mövsümün əvvəlində komandadan ayrılanlar və yeni gələnlər oldu. Siz də yeni təyin olunmuşduz. Hansı çətinliklərlə üzləşdiz?
– Düzünü desəm, ciddi çatışmazlıqla üzləşmədim. Ən başdan indiyə qədər hər şey qaydasında olub. Rəhbərlik bizə hər mənada dəstək oldu. Futzalçılarım da çalışqandı və vəzifələrini anlayıb layiqincə öhdəsindən gəlməyə çalışırlar.

– Ölkə kubokundakı mübarizəniz uğurla davam edir...
– Bəli, hər oyuna qələbə üçün çıxırıq. Rəhbərlik tərəfindən qarşımıza cari mövsümü “qızıl dubl”la bitirmək məqsədi qoyulub. Əlimizdən gələni edirik ki, vacib tapşırığı yerinə yetirə bilək.

– Gələn ayın sonunda müqavilənizin vaxtı bitir. Bu haqda nə düşünürsüz?
– Hazırda yüksək liqa və ölkə kubokundakı matçlara köklənmişik. Vaxtı gələndə rəhbərliklə müzakirəmiz olacaq.

– Belədə çempionatımıza qayıdaq. Mövsümün əvvəlində “Yasamal Bakı” yarışa qoşuldu. Bununla belə, U-19 və “Record club” çox zəif çıxış edir. Yuxarı pillələrlə aşağılar arasında uçurum var. Bu problemi necə aradan qaldırmaq olar? Əsasən komanda sayının və maliyyənin azlığı kimi problemləri qabarda bilərik?
– Bəli, bu tipli yarışlarda komanda sayı nə qədər çox olsa, bir o qədər yaxşıdı. Təkcə Bakını yox, başqa şəhərləri təmsil edən kollektivlərlə də qarşılaşmaq xoş olardı. Başqa məsələlər isə mənə aid deyil. Bizim işimiz məşq etmək və nəticə qazanmaqdı. Hər halda, “Araz-Naxçıvam” Azərbaycan futzalının flaqmanıdı və bunu hər il sübut edir.

– Həm də yığmanın baş məşqçisisiz. Yığmayla bağlı planlar necədi?
– Aprelin 8-də təlim-məşq toplanışı üçün bir araya gələcəyik. 13-ü isə yoldaşlıq oyunları keçirmək məqsədilə Gürcüstana yollanacağıq. Növbəti planlar hələ ki bəlli deyil. Vurğuladığınız kimi, müqaviləmin müddəti mayda başa çatır. Sonra nə olacağını hamımız görəcəyik. Sonda “Futbol+” kollektivinə bir daha təşəkkür etmək istəyirəm. Çünki futzala diqqət yetirən, maraqlanan az sayda mətbuat orqanlarından birisiz.

KƏNAN BAHADIR