“Barselona” aparıcı və ya komandanın gələcəyi üçün vacib sayılan futbolçularını qorumağa davam edir.

"Football-plus.az" xəbər verir ki, Alexandro Balde ilə müqavilə yenilənib.

Klub saytının yaydığı xəbərə görə, 20 yaşlı müdafiəçinin yeni sözləşməsinin müddəti 2028-ci ilin yayına qədərdi. Rəhbərlik onun satış qiymətini 1 milyard avro müəyyənləşdirib. Qeyd edək ki, “Barselona”nın yetirməsi olan Balde əsas komandada 2021-ci ildən çıxış edir. O, Kataloniya klubunda ümumilikdə 41 oyun keçirib və 1 qol vurub. Gənc futbolçunun bu mövsüm La Liqanın 4 oyununda iştirak etdiyini də bildirək.

Yeri gəlmişkən, Frenki de Yonqun da “Barselona”da daha uzun müddət oynamaq imkanı var. Klub onunla müqaviləni yeniləməyi planlaşdırır. Bu mövzuda futbolçu ilə danışıqlar aparılır. Rəhbərlik niderlandlı yarımmüdafiəçinin müqaviləsinin müddətini 2028-ci ilin yayına qədər artırmaq istəyir. Frenki yeni təklifi qəbul edəcəyi halda maaşı ildən-ilə artırılacaq. Onun hazırkı sözləşməsinin müddəti 2026-cı il iyunun 30-na qədərdi.