“Hələ ki bir tur arxada qalıb, hər şey qarşıdadı. İlk oyunumuzu səfərdə “Ağdaş”a qarşı keçirdik. Azarkeşlərin də oyuna marağı böyük idi. Bu liqanın faydası odu ki, bölgələrə futbol qayıdıb. Bəzi istedadlı gənclərimiz də bu imkandan faydalana, özlərini bu çempionatda göstərə bilərlər. Rayonlarda adamların futbola marağı böyükdü. Mən də mövsüm bitəndən sonra karyeramı bitirmək qərarına gəlmişdim. Lakin “Şahdağ Qusar”ın baş məşqçisi Bəhram Şahquliyev mənə təklif göndərdi və mənim üçün doğma olan kollektivə kömək etmək istədim. Bu klub mənə əziz olduğu üçün “yox” deyə bilmədim. Çünki futbolun sirlərini burda öyrənmişdim. İndi mən də əlimdən gələni edəcəm ki, “Şahdağ Qusar” böyük futbola qayıtsın, azarkeşlər oyunlarımızı premyer-liqada izləsinlər”.

“2-ci liqa gözləniləndən də maraqlı başladı. AFFA-nın dəstəyi ilə liqamız yaxşı olacaq. Bölkə klublarının olması isə çempionatı çox işıqlandıracaq. Biz ilk oyunda “Sheki City” ilə qarşılaşdıq. Ordakı azarkeşlərin futbola marağını gördük. Gözəl atmosfer var idi. Məncə, fanatlar cəhətdən bölgə klubları premyer-liqa təmsilçisilərindən seçilir. Çünki burdakı azarkeşlər qəlblərindəki sevgiylə gəlib doğma komandalarını dəstəkləyirlər. Düzdü, şəhər klublarının azarkeşlərində də belə sevgi var, lakin bölgə fanatları qədər deyil. Sadəcə, stadion, maliyyə durum və futbolçuların ustalığı baxımından bu liqa premyer-liqadan geri qalır. Lakin bu çempionatın keçirilməsi təqdirəlayiq addımdı. Yaşlı futbolçuların da yenidən böyük futbola qayıtması üçün şans oldu. Düşünürəm ki, ölkəmizdə nə qədər çox klub olarsa, bir o qədər də yerli oyunçular yetişər və oynamaq üçün şərait olar”.