“Bu barədə çox danışmaq istəmirəm. Bu üzdən fikrimi konkret ifadə edəcəm. Bu gün Arif Əsədovun çalışdırdığı milliylə Canni de Byazinin rəhbrəlik etdiyi milli arasında heç bir fərq görmürəm. Nəticə olaraq hər ikisi eynidi. Elə əcnəbidənsə, millinin başında öz yerli mütəxəssislərimizin olması yetərlidi. Bolqarıstanı lap 5:0 məğlub etsəydik də, yenə də heç nə dəyişməyəcəkdi. Sadəcə, onu demək istəyirəm ki, belə nəticəni yerli məşqçiylə də əldə etmək olar. Bunun sübutunu da hamı gördü. Bir ətək pul xərcləyərək əcnəbi məşqçi gətirib qrupdan çıxmayacağıqsa, bunu yerli məşqçiylə də etmək mümkündü”.

“İlk növbədə onu qeyd edim ki, Monqolustan, Bolqarıstan kimi komandalarla oyunlar millimiz üçün faydalıdı. Çünki biz həmişə ikinci rolda olmuşuq. Monqolustanla görüşdə isə birinci rolda biz idik. Yəni oyunun axarına biz diqtə edirdik. Belə oyunlar milli komandamız üçün çox vacibdi. Çox imkanımız da oldu, sadəcə, vaxtında dəyərləndirə bilmədik. Arif Əsədovun millidə baş məşqçi kimi qalmasına gəlincə, bunun əleyhinə deyiləm. Mən həmişə yerli məşqçinin tərəfdarı olmuşam. Arif də həm ağıllı, həm də savadlı məşqçidi. Neçə illərdi millidədi. Bu mövzuda fikirlər fərqlidi. Futbolçuların potensialından istifadə etməyə gəlincə, Azərbaycanda nə qədər oyunçu var ki, Arif müəllim onlardan düzgün istifadə etməsin?! Hesab edirəm ki, Əsədov əlimizdə olan futbolçulardan düzgün istifadə etdi. Bunu Bolqarıstanla oyunda da göstərdi. Oyunda üstünlük, demək olar ki, bizim tərəfimizdəydi. Doğrudu, ilk qolu bolqarlar vurdu. Amma Musa Qurbanlın son dəqiqələrdə vurduğu qolla görüş heç-heçə bitdi. Bizim üçün bərabərlik heç də pis nəticə deyil. Ola bilsin, Arif Əsədovun çatışmayan cəhətləri var. Ancaq elə bir məşqçi yoxdu ki, onun çatışmayan cəhəti olmasın. Hətta Pep Qvardiolanın da çatışmayan cəhətləri olduğunu görərik. Lakin çatışmayan cəhətlərin də üzərində işləyib, onları düzəltmək olur. Yenə deyirəm ki, əldə olan futbolçular budu. Sevindirici hal odu ki, bu oyunlarda hər iki qapıçıya şans verdi. Hələ ki uğur qazanmaq barəsində danışmaq tezdi. Hamımız uşaq futbolundan danışırıq, amma nəsə bir şey fikirləşmək lazımdı. AFFA-da prezident seçkisindən sonra dəyişikliklər olacaq. Bu dəyişikliklərdən sonra təkan verib 3-5 məktəb yaratmaq lazımdı. Necə ki o vaxt Fuad Musayev “Şəfa”nı yaratmışdı, ordan da bir neçə futbolçu çıxdı. Həmin oyunçular həm millidə, həm də yüksək liqada mübarizə apardılar. Belə şərait yenidən yaradılmalıdı. Həmin futbolçular onlara yaradılmış şəraitin əvəzində də yaxşı oynadılar. Bu üzdən də yenə bu yöndə nəsə etmək lazımdı. U-15, U-17, U-19, U-21 də məğlub olur. Əsas millinin arxasınca da onlar gəlir. Çalışmalıyıq ki, əsas millimizin arxasınca gələnlər yaxşı oynasınlar. Belə olmayandan sonra baş məşqçinin kimliyinin fərqi yoxdu. İndi əlimizdə olan bunlardı. Yaxşısı da kimdisə, sizli-bizli tapıb verək Arif müəllimə və ya millinin baş məşqçi postuna kimi təyin edəcəklərsə, həmin şəxsə. Belə olandan sonra Millətlər Liqasında uğur qazanmaq barədə danışa bilərik. Ancaq hələ ki çox çətindi”.