''Atletiko''nun ulduzu Antuan Qrizmann topuğundakı zədə üzündən Fransa yığmasının qarşıdakı yoxlama matçlarını buraxmalı olacaq.

Fransızları qarşıda Almaniya və Çiliyə qarşı yoldaşlıq oyunları gözləyir. Bununla da Qrizmann 2017-dən bu yana, daha dəqiq desək, 6 il 7 aylıq fasilədən sonra ilk dəfə yığmanın oyununu buraxmalı olacaq!

O, sonuncu dəfə 2017-nin iyununda İngiltərəyə qarşı matçda meydana çıxmamışdı. Hərçənd həmin oyunda bu futbolçu ehtiyat oyunçular skamyasında idi. Möhtəşəm seriya həmin ilin avqustun 31-də Niderlanda qarşı oyunla start götürdü. Həmin oyundan başlayaraq Qrizmann indiyə qədər ''xoruzlar''ın ardıcıl 84 matçında meydana çıxmışdı. Əslində təcrübəli futbolçu hələ ötən ilin oktyabrında yığmada ardıcıl 81-ci rəsmi oyunda forma geyərkən adını futbol tarixinə yazdırmışdı.

Ona qədər yığma səviyyəsində heç kimin bu cür seriyası olmamışdı. 81-ci oyundan sonra Qrizmann yığmada daha 3 görüş keçirdi və bu dəfə Didye Deşam zədəsini tam sağaltmayan futbolçunun səhhəti ilə riskə getmək istəmədi. Bu üzdən ona təklif göndərmədi.

Yeri gəlmişkən, 33 yaşlı futbolçu 2014-cü ildən bu yana yığmada 109 qarşılaşmada start heyətində meydana çıxıb. Bu müddət ərzində heç kim bu cür göstərici ilə öyünə bilməz. Antuan indiyə qədər yığmada 127 oyun keçirib və 44 qol vurub. O, yığma tarixinin ən məhsuldar oyunçuları siyahısında yalnız Jiru (56), Anri (51) və Mbappedən (46) geri qalır.

ƏLİ