Misli premyer-liqasının 27-ci turunda "Turan Tovuz" "Qarabağ"ı qonaq edib - 1:3.

"Football-plus.az" xəbər verir ki, oyundan sonra meydan sahiblərinin çalışdırıcısı Ayxan Abbasovun mətbuat konfransı keçirilib. Sizi onun fikirləri ilə tanış edirik:

- Bruno Qonçalveşin yoxluğu hiss olunurdu?
- Bütün futbolçuların yeri görünürdü. Amma onların yerində oynayanlar çalışdılar. Paçunun yoxluğu neçə oyundu bizə təsir edir. Bütün futbolçular bizim üçün dəyərlidi. Hamı sağlam olanda bizim üçün daha rahat olur.

- Eyni mövqedə oynayan bir neçə futbolçu var. Bu, heyəti qurarkən sizə mane olmur?
- Yox. Oyun olub ki, Ayxan Quseynovla Fərid Nəbiyev eyni anda meydana çıxıblar. Rəqibə görə heyət qururuq. Heyət geniş olmalıdı. Xəyal Nəcəfovu qışdan sonra hər dəfə əsas heyətdə oynatmaq istəyəndə zədələnir. Bu gün pis təsir bağışlamadı.

- Veysəl Rzayevin oynamamasının səbəbi nə idi?
- Burnu sınıb. Yəqin ki, çempionat onun üçün başa çatıb.

- Geridə qalan periodu necə dəyərləndirirsiniz?
- Üçüncü dövrəni yaxşı keçirdik. Məğlubiyyətlə başlasaq da, sonra vacib qələbələr qazandıq. Dördüncü dövrə hər kəs üçün çətin olacaq. Buna hazırlaşacağıq.

- Bu gün sanki "Bayer" - "Qarabağ" matçının təkrarı idi. Rəqib dəyişikliklər etdikdən sonra oyunu dəyişə bildi. Siz necə düşünürsünüz?
- Buna hazır idik. Bu heyəti gözləyirdik. Dəyişikliklərin də olacağını bilirdik. Bu gün ustalıq öz sözünü dedi. Bizim üçün də belə oyunlar lazımdı. İlk hissədə demək olar ki, "Qarabağ"a epizod vermədik. İkinci yarıda isə çətinlik çəkdik.