Çərşənbə axşamı Çempionlar Liqasında 1/8 final mərhələsinin cavab görüşlərindən ikisi keçirildi.

"Football-plus.az" xəbər verir ki, İlk oyunda səfərdə “Napoli” ilə heç-heçə edən “Barselona” evdə bu komanda üzərində inamlı qələbə qazandı. “Arsenal” isə penalti seriyasında “Portu”dan üstün olmaqla 1/8 final lənətini də üzərindən götürdü. Beləliklə, növbəti mərhələdə oynayacaq 8 komandadan altısının adı bəllidi. Bunlar “Arsenal”, “Barselona”, “Bavariya”, PSJ, “Real” və “Mançester Siti”di. 1/4 finalın son iki iştirakçısının adına isə dünən gecə aydınlıq gəldi.

“Barselona” dörd ildən sonra 1/4 finalda!

Barselona – Napoli 3:1 (2:1)
Barselona (İspaniya): Ter Ştegen, Kunde, Arauxo, Kubarsi, Kanselo, Kristensen (Romeo, 60), Gündoğan, Lopes (Roberto, 60), Yamal, Levandovski, Rafinya (Feliş, 81).
Napoli (Neapol, İtaliya): Meret, Di Lorentso, Rrahmani, Jezus, Ruy (Olivera, 64), Zambo-Anqissa, Lobotka, Traore (Raspadori, 78), Politano (Lindstrem, 64), Osimhen, Kvaratsxeliya (Nqonq, 90+2).
Qollar: Lopes, 15 (1:0). Kanselo, 17 (2:0). Rrahmani, 30 (2:1). Levandovski, 83 (3:1).
Vərəqələr: Kristensen, 19. Yamal, 44. Jezus, 45+2. Traore, 63. Olivera, 67 – sarı.
Hakim: Danni Makkeli (Niderland).
12 mart. Barselona. 50301 tamaşaçı.
İlk oyun – 1:1.
oyunun statistikası
24 (10) qapıya (çərçivəyə) zərbə 14 (4)
7 künc zərbəsi 2
1 ofsayd 4
7 qayda pozuntusu 16
2 (0) sarı (qırmızı) vərəqə 3 (0)
47 topa sahibolma (faizlə) 53

Bu komandalar arasındakı ilk oyunun nəticəsi kimin növbəti mərhələyə adlayacağı ilə bağlı suala heç bir aydınlıq gətirməmişdi. Neapoldakı oyunun əksər bölümlərində dominantlıq edən kataloniyalılar sonda rəqibə təşəbbüsü ələ almağa, hesabı bərabərləşdirməyə imkan vermişdi. Hər halda, İspaniya təmsilçisi favorit kimi görünürdü, axı bu dəfə “doğda divarlar” amili də “Barselona”nın tərəfində idi. Yeri gəlmişkən, “Napoli” əvvəllər heç vaxt bu komandaya qalib gəlməmişdi (İspaniya klubu iki qələbə qazanmış, üç dəfə heç-heçə etmişdi). Maraqlıdı ki, əvvəlki beş duelin hamısında komandaların hər biri qol vurmuşdu. Bəribaşdan deyək ki, ənənə bu dəfə də pozulmadı. Həm “Barsa”nın, həm də “Napoli”nin azarkeşlərinin nikbinlik üçün müəyyən əsası var idi. Xavi yayda baş məşqçi postundan gedəcəyini elan edəndən sonra kataloniyalılar bir dəfə də uduzmayıb, çempionluq uğrunda mübarizəni davam etdirir. Baxmayaraq ki, “Real”la xal fərqi yetərincə böyükdü. “Napoli” isə yeni baş məşqçinin dönəmində heç kimə uduzmamışdı. Kaltsona “sükan arxasına” keçəndən bəri neapollular iki dəfə heç-heçə etmiş, daha üç oyunda qələbə qazanmışdı. Onlar hətta “Yuventus”u da məğlub etmişdi. A seriyasında 7-ci pillədə qərarlaşan “Napoli” ilk “4-lüy”ə düşmək şansını qoruyur. “Barselona” da yaxşı formadadı. Neapoldakı ilk oyundan sonra üç qarşılaşmaya çıxan Xavinin komandası La Liqada 7 xal toplamış, 5 qol vurmuş, birini də buraxmamışdı. Heyətlə bağlı problemlərə gəlincə, “Barsa” müxtəlif səbəblərdən Balde, Alonso, Qavi, Torres, Pedri və De Yonq kimi oyunçularının xidmətindən məhrum idi. Qonaqlara isə yalnız Zelinski kömək edə bilməyəcəkdi.

Tribunalara toplaşan və ekran arxasında əyləşən futbolsevərlərin bu oyunun səviyyəsindən razı qalmamaq üçün əsası yoxdu. “Napoli” hər nə qədər supermotivasiyalı olsa da, katalaniyalılar, sadəcə, rəqibdən güclü idi. Xavinin oyunla bağlı planı doğruldu, “göy-qırmızılar” ilk 17 dəqiqədə iki qol vurdu. Əvvəlcə Lopes rəqib qapısına yol tapdı, cəmi iki dəqiqə sonra isə Rafinyanın dirəkdən dönən zərbəsini Kanselo tamamladı. Qonaqların heyətində Osimhen daha çox canfəşanlıq edirdi, ancaq “Barsa”nın müdafiəçiləri müntəzəm onu “ofsayd tələsinə salırdı”. Amma “Napoli”nin heyətində başqa qəhrəman tapıldı. Yarım saatın tamamında hücumu başlayan Rrahmani onu məhsuldar zərbə ilə bitirdi. Kosovolu müdafiəçi topu qapının küncünə göndərdi, Ter Ştegen tullansa da, çata bilmədi. 2-ci hissənin əvvəlində “Barsa”nın müdafiə xətti çətin anlar yaşadı. Qonaqlar rəqibi meydanın özünə aid hissəsinə sıxışdırmışdı. Ancaq kataloniyalılar bu təzyiqə dözdülər və tezliklə təşəbbüsü yenidən ələ keçirdilər. Meretin işi yenidən artdı. Yamal 2-ci hissənin ortalarında növbəti dəfə fərqlənsə də, bu qol ofsayd üzündən qeydə alınmadı. “Barselona” qol vəziyyətlərini bir-birinin ardınca boşa verirdi. 80-ci dəqiqədə az qala hesab bərabərləşəcəkdi. Lindstrem qapıçı meydançasının xətti üzərindən “çərçivə”yə düşə bilmədi. Və bundan dərhal sonra qonaqların növbəti mərhələyə adlamaq arzusu “suya düşdü”. Serxi Robertonun təşkil etdiyi hücumu Levandovski dəqiq zərbə ilə bitirdi. Qalan vaxt ərzində hesab dəyişmədi. İnamlı qələbə qazanan “Barselona” 2019/20 mövsümündən sonra ilk dəfə ÇL-in 1/4 finalında oynayacaq. Kataloniya nəhənginin məğlubiyyətsiz oyunlar seriyası davam edirsə, “Napoli” Kaltsona dönəmində ilk dəfə uduzdu.

Faktlar
* “Barselona”nın start heyətində 18 yaşını tamamlamayan iki futbolçu var idi. Söhbət 16 yaşlı Lamin Yamalla 17 yaşlı Pau Kubarsidən gedir. Turnirin tarixində indiyə qədər heç bir klub start heyətinə yaşı 18-ə qədər olan iki futbolçu salmamışdı.
* İlk qolun müəllifi Fermin Lopes “Barselona”nın son 6 ildə ÇL-in pley-offunda fərqlənən ən gənc futbolçusudu. Oyun günü o, 20 yaş 306 günlük idi. Sonuncu belə rekord 2018-in martında “Çelsi”nin qapısına yol tapan Usman Dembeleyə məxsus idi.

Oyundan sonra
Xavi Ernandes, “Barselona”nın baş məşqçisi: