Dekabrın 18-də futbolsevərlərin diqqəti İsveçrənin Nyon şəhərində keçirilən tədbirə yönəlmişdi.

“Football-plus.az” xəbər verir ki, burda Çempionlar Liqasının (ÇL) 1/8 finalının və Avropa Liqası (AL) ilə Konfrans Liqasının (KL) pley-off mərhələsinin püşkatma mərasimi baş tutdu.

Əvvəlcə Avropanın ən nüfuzlu və gəlirli klub turnirində mübarizəni davam etdirən 16 komanda 8 cütə ayrıldı. Qeyd edək ki, 1/8 finalın püşkü son illərdə olduğu kimi, müəyyən qaydalara əsasən atıldı. Bu mərhələdə qrup turnirinin 8 qalibi ilə qrupları 2-ci yerdə başa vuran komandalar bir-birinə rəqib ola bilərdilər. Ancaq eyni qrupda yarışan və eyni ölkəni təmsil edən klublar 1/8 finalda qarşılaşa bilməzdilər. İştirakçılar əvvəlcə bu şərtlərə əsasən iki səbətə ayrılmışdılar. “Səpələnmişlər” səbətinə “Bavariya” (Almaniya), “Mançester Siti”, “Arsenal” (hər ikisi İngiltərə), “Real”, “Real Sosyedad”, “Atletiko”, “Barselona” (hamısı İspaniya) və “Borussiya” (Dortmund, Almaniya) düşərkən “səpələnməmişlər” səbətində “Kopenhagen” (Danimarka), PSV (Niderland), “Napoli”, “İnter”, “Latsio” (hamısı İtaliya), PSJ (Fransa), “Leyptsiq” (Almaniya) və “Portu” (Portuqaliya) yer almışdı.

Püşkün nəticələrinə nəzər salarkən İtaliya və İspaniyanın iki komandasının bir-birinə rəqib olması diqqəti daha çox cəlb edir. “Napoli” ilk oyunda “Barselona”nı, “İnter” isə “Atletiko”nu qəbul edəcək. Yeri gəlmişkən, “Napoli” ilə “Barselona” AL-in 2021/22 mövsümündə pley-off mərhələsində qarşılaşmışdı. İspaniyadakı ilk matç 1:1 hesabı ilə nəticələnmiş, İtaliyadakı cavab görüşündə 4:2 hesabıyla qalib gələn “Barselona” 1/8 finala çıxmışdı. “Napoli” kimi “İnter” də “Atletiko”dan qisasını almağa çalışacaq. Belə ki, bu komandalar arasında 2010-cu ildə keçirilən Avropa Superkuboku matçı madridlilərin 2:0 hesablı qələbəsi ilə nəticələnmişdi. Onda “İnter”in ÇL-in, “Atletiko”nun isə AL-in qalibi olduğunu da xatırladaq.

3-cü mövsümü keçirilən KL-in pley-off mərhələsində 16 komanda iştirak edəcək. Reqlamentə görə, qrupların qalibi olan 8 komanda (Lill, Makkabi T-Ə, Viktoriya P, Brügge, Aston Villa, Fiorentina, PAOK, Fənərbaxça) birbaşa 1/8 finalda oynayacaq. Püşkatmanın şərtinə əsasən, pley-offda qrup ikinciləri (Slovan, Gent, Dinamo, Bude/Qlimt, Legiya, Ferentsvaroş, Ayntraxt F, Ludoqorets) ilə AL-in qruplarını 3-cü yerdə bitirənlər (Olimpiakos, Ayaks, Betis, Şturm, Yunion, Makkabi H, Servett, Molde) qarşılaşacaqlar.