Azərbaycanda sürücülük vəsiqəsiylə bağlı həm gülməli, həm də acı reallığı əks etdirən bir deyim var.

Deyrirlər ki, bizdə insanlar əvvəlcə avtomobil alırlar, sonra da sürücülük vəsiqəsi. Halbuki normal halda bunun əksi olmalıdı. Maşın sürmək arzusunda olan bir şəxs əvvəlcə onu idarə etməyi bacarmalıdı, sürücülük kursuna yazılıb, imtahanlardan keçməlidi. Yalnız ondan sonra avtomobil alıb, onu sürməyə başlamalıdı. Çox təəssüf ki, bir çox sahələrdə olduğu kimi, burda da çağdaş dünya ilə ayaqlaşa bilmirik, işimizi tərsinə görürük. Ondan sonra da sürücülər də, piyadalar da bunun cəzasını çəkir. Az qala hər gün hansısa ağır qəza xəbərindən, insan itkisindən üzülüb təəssüflənirik.

Elə futbolda da belədi. Sosial şəbəkələrdə bir bayram havası yaşanır. “Kəpəz”in rəhbərliyi və Futbolun İnkişaf Fondunda çalışanlar bütün Azərbaycana, xüsusən də Gənc təmsilçisinə könül verən azarkeşlərə gözaydınlığı verir. Bilməyən də düşünər ki, “Kəpəz” nəsə böyük uğur qazanıb, avrokuboklarda mərhələ adlayıb, yaxud da komandanın premyer-liqada mükafatçılardan biri olacağı dəqiqləşib. Əslində isə bunların heç birisi baş verməyib. Uzunmüddətli mübarizədən sonra “Kəpəz”ə avtobus alıblar. İki ilə yaxın idi Futbolun İnkişaf Fondu ianə kampaniyası keçirirdi, iş adamlarına və azarkeşlərə çağırış ünvanlayırdı. “Kəpəz”ə avtobus almaq üçün yetərli məbləğ isə toplanmırdı. Axırda proses “Turan Tovuz”un avtobus almasına oxşar şəkildə aparıldı. Verilən açıqlamalarda qeyd olunur ki, avtobus ianə kampaniyasında toplanan pulun üzərində klubun öz büdcəsindən əlavə edilməklə alınıb. Sosial şəbəkələrdə belə bir iddiya da rəst gəldim ki, UEFA-nın uşaq futbolu üçün ayırdığı pulla “Kəpəz”ə avtobus alıblar. Uşaqlar gözləsə də, olar. Əsas odu ki, avtobusun ətrafında təbliğat aparılsın, əcnəbi futbolçular rahat nəqliyyat vasitəsində gəzsinlər.

Bu da sizə peşəkar klub nümunəsi. Eyni ilə sürücülük vəsiqəsini aldığımız kimi. Əvvəlcə klubu yaradıb, premyer-liqaya buraxırlar. Ondan sonra da həmin klubun futbolçularının gəzməsi üçün avtobus alınır. Gəzmək demişkən, “Kəpəz”in günü elə yollarda keçir. Gəncə təmsilçisinin stadionu təmirə bağlandığından komanda üçün ev-səfər qarşılaşmalarının fərqi yoxdu, daim fərqli meydanlarda oynamaq lazım gəlir. Bunu nəzərə alanda “Kəpəz”in futbolçularının adına sevinməmək olmur. Bu dəqiqə Azərbaycan futbolunda rahat nəqliyyat vasitəsinə ən çox ehtiyacı olan da elə “Kəpəz”di. Gün o gün olsun ki, Gəncə şəhər stadionunun təmiri yekunlaşın, “sarı-göylər” də doğma şəhərinə qayıtsın, azarkeşlərinə qovuşsunlar. Bununla da ölkənin ən köklü klublarından birinin sürgün həyatı sona çatar, gəncəli futbolsevərlərin də gözü yollardan çəkilər, həsrət bitər.

Mən bu sevincdən naxçıvanlı futbolsevərlərə də arzulayıram. “Araz-Naxçıvan” premyer-liqaya yüksələn gündən “paytaxt komandası”na çevrilib. Tam əminliklə deyə bilərəm ki, komandanın heyətində yer alan legionerlərin mütləq əksəriyyəti heç Naxçıvanın harda yerləşdiyini belə bilmirlər, onlar üçün “Araz-Naxçıvan” elə Bakının Mərdəkan qəsəbəsinin komandasıdı. Heç kimin də vecinə deyil. İllər öncə imitasiya haqqında bir yazım vardı. Orda imitasiyanın növlərini sadalayır, Azərbaycan futbolu ilə paralellər aparırdım. Bu gün bizim futbolumuzun mənzərəsi elə 10 il əvvəlki kimidi, başdan-ayağa imitasiya içindəyik. “Kəpəz”in yollarda qalması, “Araz-Naxçıvan”ın Mərdəkana sığınması da həmin o imitasiyanın nümunələridi. Özü də təkcə onlar deyil. Möhtəşəm premyer-liqamızın iştirakçılarının böyük əksəriyyəti Bakı Olimpiya Stadionunun ehtiyat meydançasına sığınıb, növbə ilə ora məşq edir. “Turan Tovuz”la “Qəbələ” zamanının böyük hissəsini Bakıda keçirir, oyundan-oyuna doğma rayonlarına gedirlər. Elə qəsəbə komandası “Zirə” də BOS-un sakinləri arasındadı. Yaxşı ki, BOS var imiş. Olmasaydı, bizim klublar “Ədliyyə” stadionunu çıraqla axtaracaqdılar.

Bütün bunların fonunda gözümə AFFA İcraiyyə Komitəsinin üzvü Kazbek Tuayevin müsahibəsi sataşdı. Deyir ki, premyer-liqa iştirakçılarının sayını 10-a çatdırmışıq, böyük uğurdu, indi bu sayı 12-ə çatdrıb, Azərbaycan futbolunun coğrafiyasını genişləndirmək lazımdı. Bu “coğrafiya dərsi”ni özünüzə saxlayın, Kazbek Əliyeviç. Sizin “geniş” coğrafiyanız BOS-un ehtiyat meydançası boydadı. Bizi aldatmağa çalışmayın!

AMAL