“Qarabağ” cümə axşamı Avropa Liqasının 1/8 finalında “Bayer-04”ü qəbul edəcək.

Tofiq Bəhramov adına Respublika stadionunda keçiriləcək oyun saat 21.45-də başlayacaq. Həmişə olduğu kimi, “köhlən atlar”ın bu avrokubok sınağına da maraq böyükdü. Son məlumata görə, artıq 27000 bilet satılıb. Satış hələ də davam edir. Məhdud sayda biletləri “İticket.az”ın satış məntəqələri (iticket.az-da onlayn satış), “Park Bulvar”dakı “Qarabağ” Fan-Şopu və Tofiq Bəhramov adına Respublika stadionunun kassalarından əldə etmək mümkündü.

Xüsusi vurğulayaq ki, biletlərin satışa çıxarıldığı ilk gün “iticket.az” saytı çökdü. Xeyli sayda azarkeş dərhal şirkətin sosial şəbəkə hesablarına axın edərək şikayətini dilə gətirdi. Onlardan bəziləri hesablarından ödəniş etsələr də, bilet əldə edə bilmədiklərini dedisə, bəziləri, ümumiyyətlə, saytın fəaliyyət göstərmədiyini bildirdi. Belədə “İticket.az” müştərilərə müraciət etməli oldu:

Şirkətin işi ilə bağlı belə qüsurlar dəfələrlə təkrarlanıb. Odu ki, şəxsən biz belə izahata inanmırıq. Ümumiyyətlə, bilet alveri üzrə ciddi bir şəbəkənin formalaşması, satış başlayan kimi alverçilərin kütləvi şəkildə bileti ələ keçirməsi ilə bağlı dərin şübhələr var. Əksəriyyət iddia edir ki, hadisə qəsdən törədilib, yəni biletlər “qara bazar”da satışa çıxarılsın və bəziləri ciblərini asan yolla doldura bilsin.

“Futbol+” olaraq, bu mövzuyla bağlı saytda qeyd olunan nömrə, yəni “Müştəri xidmətləri” şöbəsinin əməkdaşı ilə əlaqə saxladıq. Həmin şəxs bildirdi ki, bu məsələylə bağlı məsul şəxsdən cavab alınması məqsədilə bizimlə yenidən əlaqə saxlanılacaq. Hər halda, deyilən baş tutmadı. Bilet ala bilməsə də, pul ödəyənlərə isə belə cavablar verilir: “təəssüf hissi keçiririk”, “tezliklə pulunuz geri qaytarılacaq” və s. və i.a. Maraqlıdı, görəsən, müasir texnologiyalar dövründə sadə vətəndaşlara belə “kələk gələn” şirkətin məramı nədi? Bundan da maraqlı sual: “Qarabağ” azarkeşlərinin bilet almaq yolunda olmazın əziyyət çəkməsindən xəbərdarmı, niyə duruma müdaxilə etmir?

KƏNAN BAHADIR