Deyəsən, baş məşqçilərlə hakimlər bir-birini “dişə vurandan” sonra ehtiraslar sakitləşdi.

Hər halda, qarşılıqlı narazılıqların sayı azalıb. Bu tendensiya vərəqə sayında da özünü göstərir. Hakimlər 5 oyunda 21 vərəqə göstərib ki, bunların hamısının rəngi sarı olub.

Son turda idarəçiliklə bağlı əsas fikir ayrılığı “Kəpəz” – “Qəbələ” oyununda yaşandı. “Qırmızı-qaralar” Rəvan Həmzəzadənin idarəçiliyindən kəskin şəkildə narazılıq etdi.

Qarabağ – Sumqayıt, NİCAT İSMAYILLI
Oyun “Qarabağ”ın liderliyini, “Sumqayıt”in isə 2-ci yer uğrunda mübarizədə mövqeyini gücləndirməsi baxımından önəmli idi. “Köhlən atlar” yorğun olduğundan, “kimyaçılar” isə çox güman, çəkindiyindən sürətli oyun göstərmədi. Belədə hakimin işi də xeyli asanlaşdı. Cəmi iki dəfə əlini cibinə atan Nicat bəy cüzi səhvlərə yol verdi. O, gah kobud müdaxilələrə şərait yaradır, gah da adi oyun epizodlarına qarışırdı. Belə davranış bir ara Qurban Qurbanovun etirazına səbəb olsa da, yan xətt hakimiylə söhbətdən və komandasının qollarından sonra sakitləşdiyini müşahidə etdik. Ümumiyyətlə, referi matçı qənaətbəxş idarə etdi. Lakin idarəçilik üslubunu oyunboyu qorusaydı, daha yaxşı olardı.

Kəpəz – Qəbələ: RƏVAN HƏMZƏZADƏ
Turnir cədvəlinin son pillələrində qərarlaşan komandaların mübarizəsində hakim idarəçiliyi ilə bağlı çox danışmaq olar. Oyunu gərginləşdirən amillərdən biri kimi hakimin əllə oyuna görə Qəbələ təmsilçisinin penaltisini verməməsi oldu. Həmin epizodlardan biri matçın 39-cu dəqiqəsində baş verdi. Ülvi İsgəndərovun zərbəsindən sonra top Vüsal Məsimovun əlinə toxunmuşdu. Lakin baş hakim nəinki penalti qərarı verdi, heç VAR-a da baxmağı da lazım bilmədi. Ziddiyyət yaradan daha bir epizod 47-ci dəqiqəndə qeydə alındı. Bu dəfə də Urfan Abbasovun zərbəsindən sonra top aşkar şəkildə Ehtiram Şahverdiyevin əlinə dəymişdi. Rəvan Həmzəzadə korneri işarə etdi, epizodu yenidən dəyərləndirməyə ehiyac görmədi. Heç VAR otağından da epizodu dəyərləndirmək üçün baş hakimi çağırmadılar. Ümumiyyətlə, bu oyun “Qəbələ” tərəfdarlarının kəskin narazılığıyla yadda qaldı. Əllə oyunların heç birinə görə penalti təyin edilməməsi maraq doğurdu. Görəsən, top hansı vəziyyətdə oyunçunun əlinə toxunanda penalti təyin edilir? Artıq “Qəbələ”dən ayrılan Elmar Baxşıyev oyundan sonra narazılığını belə ifadə etdi: “Verilməyən penaltilər oldu. Ülvi İsgəndərovun başı yarılmalıdı ki, 11 metrlik cərimə zərbəsi təyin olunsun?”

Turan Tovuz – Neftçi: TURAL QURBANOV
Hakim idarəçiliyi ilə bağlı uzun-uzadı danışmağa ehtiyac yoxdu. Tural Qurbanovun və köməkçilərinin qarşılaşmanı yetərincə obyektiv idarə etdiyini deyə bilərik. Onsuz da hakim idarəçiliyi ilə bağlı ən çox gileylənən şəxslərdən biri kimi Ayxan Abbasovun oyunsonrası mətbuat konfransında bu mövzuya toxunmaması hakimlikdən razı qalmasının əlamətidi. Doğrudu, baş məşqçi bir-iki epizodla bağlı qaranlıq məqamların olduğunu bildirdi. Sadəcə, epizodları konkretləşdirmədi və yenidən baxacağını, təhlil edəcəyini söylədi. Oyundan sonra tovuzlu tərəfdarlarla “ağ-qaralar”ın futbolçuları arasında baş vermiş çaxnaşma hər iki komandanın çalışdırıcısına sarı vərəqə göstərilməsiylə nəticələndi. Ümumilikdə oyunun yaxşı səviyyədə idarə olunduğunu demək mümkündü.

Araz-Naxçıvan – Zirə: RAUF ALLAHVERDİYEV
“Zirə”nin inamlı qələbə qazandığı qarşılaşmada Rauf Allahverdiyevin başçılıq etdiyi hakimlər briqadasının nəticəyə təsir edən səhvi olmadı. Nominal qonaqların vurduğu qolların hamısı qaydalar çərçivəsində idi. Amma Allahverdiyevin köməkçiləri ilə zəif anlaşdığını da vurğulamalıyıq. Xüsusən də oyundankənar vəziyyətlər zamanı hakimlər qətiyyətli davrana bilmirdi. 50-ci dəqiqədə top cərimə meydançasında Qismət Alıyevin əlinə dəydi. Miço Kuzmanoviç sağ cinahdan “Zirə”nin cərimə meydançasına daxil olub, qapıya paralel ötürmə verdi. Özü də ötürməni qəsdən elə verdi ki, top Qismətin açıq əlinə toxunsun. Rauf Allahverdiyev dərhal “nöqtə”ni göstərdi. Yalnız VAR-ın müdaxiləsindən sonra epizod incələndi, hücum başlarkən “Araz Naxçıvan”ın futbolçusu ofsaydda olduğuna görə penalti ləğv edildi. Az sonra daha bir oxşar vəziyyət yaşandı. Yan xətt hakimi Pərvin Talıbov oyundankənar vəziyyətə görə bayrağını qaldırmağa tələsmədi. Hücuma davam edən futbolçu “Zirə”nin qapıçısı ilə toqquşub yerdə qalınca Allahverdiyev yenidən penalti təyin etdi. Yalnız bundan sonra Talıbovun bayrağı havaya qalxdı ki, belədə penalti qərarı da qüvvədən düşdü.

Səbail – Sabah, RƏŞAD ƏHMƏDOV
Oyun yetərincə maraqlı alındı. 20-ci dəqiqədə baş hakim “Sabah”ın qapısına penalti təyin etdi. Lakin onun qərarı yanlış oldu. Xoşbəxtlikdən VAR həmin qərarı ləğv etdi. Çünki həmin epizodda Rüfət Abdullazadə simulyasiyaya yol vermişdi və haqlı olaraq, sarı vərəqə ilə cəzalandı. İkinci hissənin startında isə meydan sahibləri hesabı açdı. Aleksandr Ramalinqom bütün müdafiəçiləri qabaqlayaraq, topu qapıdan keçirdi. Qonaqlar mümkün ofsaydla bağlı etiraz etsələr də, VAR qolun təmiz olduğunu bildirdi. Ki, referi də öncə həmin qərarı vermişdi. Əhmədov bir-iki epizodda mövqe seçimində səhvə yol versə də, ümumilikdə matçı ideala yaxın səviyyədə keçirdi.