Məhəmmədəli - Freyzer rəqabəti... - “İmarət Tayfa” portuqaliyalı azarkeşlərlə münaqişə yaşayıb?
“Qarabağ” fevralın 22-də “Braqa”nı Avropa Liqasından kənarlaşdırmaqla turnirini 1/8 finalına vəsiqə qazandı. Nəticədə ölkə futbolu tarixində turnirin bu mərhələsinə yüksələn ilk klub oldu. Təbii ki, belədə Ağdam təmsilçisinin azarkeşlərinin fikirləri maraqlıdı.
“Football-plus.az” olaraq, kollektivin sadiq azarkeş qrupu “İmarət Tayfa”nın İdarə Heyətinin üzvü Elnur Quliyevə tribuna verdik. Onun saytımıza söylədikləri:
“Əvvəlcə oyunun keçirilməsində əməyi keçən bütün şəxslərə təşəkkür edirik. Klub rəhbərliyi başqa olmaqla, məşqçilər korpusu, futbolçular, azarkeşlər, stadionda çalışanlar və qeyd etmədiyim hər kəsə minnətdarıq”.
Tərəfdar “Ruhumuz şaddı” sözləri yazılmış xoreoqrafiya və yaratdığı hisslər haqda danışdı:
“Xoreoqrafiyanın araya-ərsəyə gəlməsində əziyyət çəkən bütün şəxslərə "çox sağ ol" deyirik. Həm Qurban Qurbanov, həm də Allahverdi Bağırovun oğlu işimizi çox bəyəndi və kövrəldi. Mesajımız çox mənalı alındı. Biz özümüzü Allahverdi Bağırovun əsgərləri adlandırırıq. "İmarət Tayfa"nın gənc üzvləri nə qədər vətənpərvər, dəyərli, "Qarabağ" üçün həm maddi, həm də mənəvi fədakarlıq etməyə hazır olduqlarını sübut etdi”.
Elnurun oyun haqda fikirləri isə belədi:
“Çox maraqlı və dramatik keçdi. Başqa ölkələrdən matçı izləmək üçün gələn xeyli "Qarabağ" azarkeşi var idi. Hər biri sonda yaşadığı emosiyalara görə təşəkkür etdi. Qələbə klubumuzun şöhrətini artırdı və mövsümdən-mövsümə daha güclü olduğunu ortaya qoydu. Matçı boks dünyasında özünəməxsus iz qoymuş Məhəmməd Əli ilə Co Freyzerin rəqabətinə bənzətmək olar”.
O, yerli azarkeşlərlə portuqaliyalılar arasında hər hansı münaqişənin olub-olmamasına da aydınlıq gətirdi:
“Xeyr, hər şey qaydasında keçdi. Hər kəs normal şəraitdə komandasını dəstəklədi”.
KƏNAN BAHADIR
Digər xəbərlər
