“Qarabağ” Avropa Liqasının 1/8 finalında “Bayer-04”ə qarşı ilk oyunu martın 7-də Bakıda, cavab görüşünü isə 14-də Leverkuzendə keçirəcək.

Bilindiyi kimi, Ağdam təmsilçisini sıx qrafik gözləyir. Komanda sabah Misli premyer-liqasının 23-cü turundan təxirə salınan “Qəbələ” ilə matçda meydana çıxacaq. Ağdamlılar 25-ci turda martın 3-də “Neftçi”, 26-cı turda isə martın 10-da “Zirə” ilə qarşılaşacaq.

Kəsəsi, 16 gün ərzində 5 oyun! Üstəlik Almaniyaya səfər, rəqibin mübaliğəsiz dünyanın ən formada olan komandalarından biri “Bayer-04” olması işləri daha da çətinləşdirir. Belədə çıxış yolu premyer-liqadakı yükün azaldılmasıdı. Amma və lakin...

“Football-plus.az” xəbər verir ki, “Qəbələ” və “Neftçi” ilə oyunlar PFL tərəfindən təsdiqlənib və keçirilməmək ehtimalı sıfra bərabərdi. Bunu Qurban Qurbanov da deyib. Belə olan halda gözlər “Zirə” ilə oyuna dikilir. Əldə etdiyimiz məlumata görə, hələ ki bu oyunun keçirilib-keçirilməyəcəyi bəlli deyil. Daha dəqiqi, son qərar “Bayer-04” ilə ev oyunundan sonra veriləcək, yəni martın 7-də. “Qarabağ” həmin qarşılaşmada sərfəli nəticə qazansa və mərhələni adlamaq ehtimalı real görünsə, matç təxirə salınacaq.

KƏNAN BAHADIR