"Football-plus.az" xəbər verir ki, bu sözləri “Araz Naxçıvan”ın baş məşqçisi Azər Bağırov deyib.

O, premyer-liqanın 24-cü turunun "Zirə” ilə görüşündən sonra jurnalistlərin suallarını da cavablandırıb.

- Matçın qırılma anı penalti qərarının dəyişdirilməsi oldu?
- Son dönəmlərdə əleyhimizə, leyhimizə o qədər qərarlar görürük ki... Çoxu da əleyhimizə olur. Xətti necə çəkirlər... Ondan qabaq da qol epizodlarımız oldu. Qol vursaydıq, tam başqa cür olardı. Belə oyunları uduzanda təsir edir. Çünki ilk yarıda istədiyimizi edirdik.

- "Zirə" son 10 oyunda qələbə qazanmamışdı, 9 oyundu qol vura bilmirdi. Daha aqressiv olacaqları gözlənilirdi. Bunu nəzərə almışdız?
- Əlbəttə. "Neftçi" ilə oyunlarını da izləmişdik. Hər üç qol epizodunu da özümüz verdik. İki qol da rekaşetdən sonra vuruldu. Biz özümüz özümüzə qol epizodları yaratdıq. Səhvlərimizdən istifadə etdilər. "Zirə" bizim üçün böyük ölçüdə çətinlik yaratmadı. 60-cı dəqiqədən sonra demək olar ki, uşaqlar sındılar.