"Evdə oynayırdıq, qələbə qazanmaq istəyirdik. Futbolçularıma təşəkkür edirəm. Sona qədər mübarizə apardılar, təslim olmadılar. Azarkeşlərimiz hər rəqibə Tovuz səfərini hiss etdirirlər. Hər iki komanda qalib gəlmək istəyirdi. Rəqibin fərdi keyfiyyətləri yaxşı olan futbolçuları var. Ofsayd xəttini necə çəkdilər, bilmirəm. Filip Ozobiç öndə görünürdü. "Neftçi" ilə matçda məğlub olmamaq önəmli idi. Çempionat gərginləşir. Sona qədər bu gərginliyin içində olmaq istəyirik".

"Football-plus.az" xəbər verir ki, bu sözləri “Turan Tovuz”un baş məşqçisi Ayxan Abbasov premyer-liqanın 24-cü turunun “Neftçi” ilə görüşündən sonra keçirilmiş mətbuat konfransında deyib.O, jurnalistlərin suallarını cavablandırıb:

- Bu gün son vaxtlar az oynayan futbolçulara şans verdiniz. Onların performansını necə dəyərləndirirsiniz?
- Heyəti qurmaqda çətinlik çəkirəm. Yaxşı rəqabət var. Əsas heyətdə olmayan futbolçular çox istəkli idilər. Bu gün sonradan meydana daxil olanlar can qoydular. Komanda belə olmalıdı. Belə olanda, nəticəyə təsir edir. Qarşıdakı oyunlarda da rotasiyalar olacaq.

- Son dəqiqələrdə rəqib baş məşqçi ilə aranızda gərginlik yaşandı və hər ikiniz sarı vərəqə gördünüz. Orada nə baş vermişdi?
- Yəqin ki, hakimə düzgün məlumat vermədilər. Rəqibin baş məşqçisinə təşəkkür edirəm. Çox mədəni insandı. Hakim elə başa düşdü ki, biz mübahisə edirik.

- "Neftçi"dən icarəyə götürdüyünüz 3 futbolçuya şans verdiniz. Onları meydana buraxmaq riskli deyildi?
- Xeyr, riskli deyildi. Onlarda ikiqat motiasiyası var idi. İstəkləri görünürdü. Hər birinin yaxşı potensialı var.

- Fərid Nəbiyevə son zamanlar az şans verməyinizin səbəbi nədi?
- Bu gün qol vurdu, sual verilir. Amma 4-5 turdu Ayxan Quseynov qollar vururdu, bu suallar olmurdu. Səbəbi odu ki, onun yerinə oynayan futbolçu yaxşı çıxış edirdi. Rəqabətdi. Fərid bir az öz formasından aşağı çıxış edirdi. Amma onun potensialı var. Milli komandada oynamalı oyunçudu. Üzərində işləməlidi. Qol duyumu olan futbolçudu. Ondan çox şey gözləyirik.

- Oyun zamanı çox aqressiv idiniz. Bəzən özünüzü azarkeş kimi aparırdınız. Bunun səbəbi nə idi?
- Ola bilər. İstəyirdik ki, futbolçulara qələbə ruhunu verək. Məğlub omaq istəmirdik. Bəzən özümüz də oyunun içində oluruq, hər şeyə reaksiya veririk. Bu da oyunun stressindən irəli gələ bilər.

- "Turan Tovuz"un futbolçuları milli komandaya dəvət olunmur. Bu durumu necə şərh edirdiniz?
- Yaxşı sualdı. Turnir cədvəli təsir edir. Keçən il də öz klubunda oynamayan futbolçular milliyə dəvət olunurdu. Amma aşağı pillələrdə olan klubların futbolçularına daim diqqət edilmir. Ümid edirəm ki, yeni baş məşqçi bu detala fikir verəcək. Milli komandanın qapıları hər kəsə açıq olmalıdı.

- Aqil Məmmədovla mübahisə edirdiniz. Nə baş vermişdi?
- Mübahisə etmirdik. Aqil dedi ki, Qaranın başına nəsə atıbar. Dedim ki, görürük. Azarkeşləri qızışdırmaq olmaz. Amma vəziyyəti normal şəkildə sakitləşdirdik.