"Bizim klubun daxilinə aid olmayan, kənar məsələlər var. Sanki onlar çalışır ki, "Qəbələ" aşağı liqaya düşsün. Hansısa hakim gəlib deyir ki, 5 xal geridəsiz, onsuz da çatmayacaqsız. Bu fikirlə gələn hakimin meydanda səhv etməsi, əleyhimizə rahatlıqla yanlış qərarlar verməsi artıq anlaşılandı. Deməli, bunlar artıq kiminsə beyninə salıb. Kimsə psixoloji cəhətdən komandanı sındırmaq istəyir. “Artıq düşmüsüz, ona görə də etiraz etməyin” fikrindədilər. "Sumqayıt"la oyunda qapımıza verilən penaltinin eynisi bu oyunda baş versə də, heç bir reaksiya olmadı. Nə hakim VAR-a getdi, nə də VAR-dan onu çağırdılar. "Kəpəz"in futbolçusunun dirsəklə Ülvinin başına vurduğu zərbəni heç bir hakim görmədi. Onların əlinə dəyən epizodu bizə sübut etməyə çalışdılar ki, təbii vəziyyətdi. Sanki biz təbii vəziyyətin necə olduğunu bilmirik.

Artıq açıq-aşkar görünür ki, hakimlər "Qəbələ"yə qarşı rahatlıqla səhv edib cəzasız qalırlar. Amma əmin olsunlar ki, artıq cəzasız qalmayacaqlar. Bu səhvlərə görə cavab verəcəklər. Artıq hamının eyni sözü deməsi şübhə yaradır. Meydanda 6 hakim eyni qərarı verirsə, bu o deməkdi ki, burda təşkilatlanma var. Eybi yox, biz hamısının axırına çıxacağıq. Heç nədən qorxmuruq və heç kimdən çəkinmirik. Çünki o epizoda penalti verməməyin, sonra da o qərarın düz olduğunu sübut etməyə çalışmağın başqa adı yoxdu.

Avropada dəfələrlə görülüb ki, müdafiəçi topu qarşılamağa gələndə əlini arxada saxlayır. Çünki əlinə dəysə, penaltidi. O zaman hər kəs əlini yanına salıb gedər də, niyə arxasına qoysun ki? Birinci dəfə deyil ki futbola baxırıq. Elə bizim hakimlər də dəfələrlə belə epizodlarda penalti veriblər. Biz hələ də heç nə itirməmişik. Qarşıda 13 oyunumuz var. Sona qədər döyüşəcəyik. Heç kim asan təslim olacağımızı düşünməsin".