Nazim Süleymanov: “Futbolçularımız dindirilir, mən heç yerə getməmişəm”
1-ci liqada mövsümə iddialı başlayan, ancaq tezliklə maliyyə problemlərindən sarsılan “İrəvan”ın başınının üzərini yenə də qara buludlar alıb. Özü də bu dəfə vəziyyət daha ciddidi.
Söhbət komandanın bir qrup oyunçusunun, hətta bəlkə rəhbərliyin də danışılmış oyunda iştirak ehtimalından gedir.
“İmişli” ilə fevralın 9-da evdə keçirilən oyunda düşərgəsində 16 futbolçu olan Nazim Süleymanovun komandası fevralın 15-də Şamaxıya 13 futbolçu ilə yollanıb. Sən demə, elə həmin gün komandanın 7 oyunçusu Dövlət Təhlükəsizlik Xidmətinin (DTX) əməkdaşları tərəfindən sorğu-sual edilib. Bu barədə "İrəvan"ın baş məşqçisi Nazim Süleymanov məlumat verib. Onun dediyinə görə, futbolçular dindirilsə də, qərarı AFFA açıqlayacaq:
"Futbolçularımız dindirilib. Buna görə "Şamaxı" ilə oyuna 13 futbolçu ilə çıxdıq. Cəmi bir dəyişiklik edə bildik. Proses davam edir, tək bizim yox, başqa klubların da adı danışılmış oyunlarda hallanır. Yəqin araşdırma prosesi davam edir.Yekun qərarı AFFA açıqlayacaq".
“Football-plus.az” bu gün 59 yaşını tamamlayan Nazim bəylə bir daha əlaqə saxladı:
“Qara buludlar hələ ki komandanın üstündən çəkilməyib. Sponsora gəlincə, AFFA-dan başqa maliyyə dəstəyimiz yoxdu. Sadəcə, AFFA-dan aylıq 30 min ayrılır. Bəlkə də var, biz görməmişik. Oyunçularımızın dindirilməsi davam edir. AFFA da bu istiqamətdə araşdırma aparır. DTX kimin adı hallanırsa, onu da aparır. Mən heç yerə getməmişəm”.
DTX-nın diqqətini çəkən oyun isə ölkə kubokunun 1/8 finalı çərçivəsində baş tutub. Xatırladaq ki, “İrəvan” həmin oyunda “Araz-Naxçıvan”a 2:8 uduzub.
KAMAL SƏFƏR
Digər xəbərlər
