“Turan Tovuz” Misli premyer-liqasının 22-ci turunda “Qəbələ”ni məğlub etdi.

Meydan sahiblərinin qələbəsinə bir qol, bir məhsuldar ötürmə ilə fayda verən iki futbolçudan biri Ayxan Quseynov oldusa, ikincisi Aleks Souza idi. Braziliyalı futbolçu matçdan sonra “Futbol+”in suallarını cavabladı.

- “Turan Tovuz”un heyətində ikinci qolunu vurdun. Oyun və qolla bağlı təəssüratlarını öyrənə bilərik?
- Yolumuza davam etməli, addım-addım irəli getməliyik. Gözəl qələbə və vacib 3 xal qazandıq. Ardını gətirməliyik. Allaha şükür olsun ki, mənə qol vurmaq şansı verdi.

- Növbəti turda “Sumqayıt”a qarşı matç var. Həmin oyundan gözləntin necədi?
- Təbii ki, qələbə üçün oynayacayıq. Bilirik ki, bu rəqibə qarşı çox ciddi hazırlaşmaq lazımdı.

- Qələbə sayəsində ilk "üçlüy"ə də yaxınlaşdız. Komandanın avrokubok şansını necə dəyərləndirirsən?
- Çox şadam ki, bunu bacardıq. Ailə kimi bütün maneələrin öhdəsindən gələcəyik. Bu mənada bizə bu mühiti yaradan azarkeşlərə, xüsusilə “Ultras Turan”a təşəkkür edirəm.

- Süni ot örtüyündə oynamaq performansına necə təsir edir?
- Çox istərdim ki, təbii meydançada oynayaq. İndi süni örtükdə oynadığımız üçün oyundan öncə də süni örtükdə məşq edirik ki, öyrəşək.

- Əvvəl çıxış etdiyin liqalarda da azarkeş dəstəyini belə dərindən hiss etmisənmi?
- “Turan Tovuz”un çox yaxşı tərəfdarları var. Düzü, sabiq komandalarımın belə azarkeşləri yox idi. Sanki basketbolda meydana çıxırdım. Burda elə deyil.

- Niyə məhz “Turan Tovuz”u seçdin? Başqa ölkələrdən və ya bizim premyer-liqa klublarımızdan təklifin var idi?
- Mental olaraq bura mənə daha rahatdı. İstəyirəm ki, daha çox qalım.

- Ayxan Abbasov mətbuat konfransında sənin sanki tovuzlu olduğunu dedi. Sən də belə hiss edirsən?
– Çox ağır sualdı. Sadəcə, baş məşqçimizin çox yaxşı biri olduğunu deyə bilərəm. İstəyirəm ki, onun ümidlərini daha çox doğruldum. Etiraf edim ki, Ayxan Abbasov mənim üçün ən mükəmməl məşqçidi.

ƏSƏD SEYİDOV