AÇ-2028 və və AÇ-2032-yə ev sahibliyi edəcək ölkələrin adları hələ də bəlli deyil.

"Football-plus.az" xəbər verir ki, qalib ölkələr sentyabrda baş tutacaq UEFA-nın konqressində açıqlanacaq.

Bu arada İtaliya mətbuatının yazdığına inansaq, UEFA AÇ-2032 üçün iki ölkənin - İtaliya ilə Türkiyənin namizədliyini birləşdirmək istəyir. Yəni növbəti dəfə nəhəng turnirə iki ölkə ev sahibliyi edə bilər. Bu plan həyata keçsə, hər iki ölkədən 6 stadion olmaqla ən yaxşı 12 arena seçiləcək. Türkiyədə stadionlarla bağlı problem yoxdu. İtaliyanın isə bu turnir üçün yeni stadionlar tikəcəyi və ya bəzi köhnə stadionlarda yenidənqurma işləri aparacağı gözlənilir. Yerli federasiya ilə İtaliya hökuməti arasında artıq bununla bağlı anlaşma əldə olunub.

Şaiyələrə inansaq, AÇ-2032 bu iki ölkəyə verilsə, açılış oyunu İstanbuldakı ''Atatürk Olimpiya'', final isə Romadakı ''Olimpiya'' stadionunda keçiriləcək. Türkiyə eyni zamanda AÇ-2028 üçün də namizədliyini irəli sürüb. Bu turnir üçün türklərdən başqa Böyük Britaniya ilə İrlandiya birlikdə namizəddi. AÇ-2032 üçün isə Türkiyənin yeganə rəqibi İtaliyadı. Türkiyə ilə İtaliyanın namizədliyi birləşdirilsə, faktiki olaraq uduzan qalmayacaq. Yəni AÇ-2028 avtomatik olaraq Britaniya ilə İrlandiyaya, AÇ-2032 isə Türkiyə ilə İtaliyaya qismət olacaq.

Ümumiyyətlə qitə turnirinə birdən artıq ölkənin ev sahibliyi etməsinə son illərdə tez-tez rast gəlinib. Məsələn, son 6 AÇ-nin yalnız 2-də meydan sahibi bir ölkə olub. 2004-də turnirə Portuqaliya, 2016-da isə Fransa ev sahibliyi edib. AÇ-2000 Belçika və Niderland, AÇ-2008 Avstriya və İsveçrə, AÇ-2012 Ukrayna və Polşa, AÇ-2020 isə Azərbaycan da daxil olmaqla 11 fərqli ölkədə keçirilib.

ƏLİ