Son günlər transferdə fəallaşan və Enes Bardini heyətinə qatan “Trabzonspor” daha 2 futbolçu ilə güclənib.

Football-plus.az xəbər verir ki, onlardan biri futbolsevərlərə yaxşı tanışdı. Söhbət “Barselona”nın yetirməsi olan mərkəz medafiəçisi Mark Bartradan gedir. Srağagün axşam saatlarında Trabzona gələn 31 yaşlı təcrübəli müdafiəçini hava limanında fanatlar böyük coşqu ilə qarşıladı. Dünən isə transfer rəsməm açıqlandı və adı UEFA-ya göndərilən iştirak ərizəsinə də salınan Bartra “Kopenhagen”ə qarşı bugünkü oyunda meydana çıxa biləcək. Bu transfer qaradənizlilərə 1 milyon 250 min avroya başa gəlib. Bu məbləğ Bartranın əvvəlki klubu “Betis”ə 2 il ərzində 2 hissəyə bölünərək ödəniləcək. Futbolçunun özü ilə üçillik müqavilə imzalanıb. Bartranın illik məvacibi 1,5 milyon avro təşkil edəcək. Müqavilədə maksimum 700 min avroya bərabər olan bonuslar da mövcuddu. 11 yaşından “La Masiya” akademiyasında yetışən və 2010-16-cı illərdə “Barselona”nın əsas komandasında top qovan Bartra güclü rəqbət üzündən əsas heyət uzvunə çevrilə bilməmişdi. O, 2016-da 8 milyon avro qarşılığında Dortmund “Borussiya”sına transfer olundu. 2018-in yanvarından etibarən isə “Betis”in şərəfini qoruyurdu. Bartra futbol dünyasında daha çox 2014-ün aprelində “Real”a qarşı İspaniya kubokunun finalında Qaret Beyllə yaşanan məhşur epizodda sürətdə ona uduzması, eləcə də 2017-nin aprelində ÇL-in 1/4 finalında “Monako” ilə oyundan öncə “Borussiya”nın avtobusunun yanında bombanın partladılması nəticəsində qolundan xəsarət alması ilə populyardı. Düzdü, müdafiəçi həmin hadisədən bir ay sonra meydana qayıtdı. İspaniya yığmasında 14 oyuna çıxan və 1 qol vuran Bartra karyerası boyunca 15 titul qazanıb ki, 13-ü “Barselona”nın payına düşür.

“Trabzonspor”un digər transferi Muntassir Lahtimi isə futbol dünyasında yeni isimdi. Visça zədələnəndən sonra vinger axtarışında olan rəhbərlik üstünlüyü 21 yaşlı mərakeşliyə verib. Lahtimi Mərakeş təmsilçisi “Rabat”ın yetirməsidi və bu klubdan başqa heç yerdə oynamayıb. Mərakeşin heyətində Konyada keçirilən 5-ci İslam Həmrəyliyi Oyunlarında iştirak edən Lahtimi tibbi müayinədən keçmək və müqaviləyə imza atmaq üçün Trabzona gəlib. Bu keçidin ən qısa zamanda açıqlanacağı gözlənilir.